Kryetari i KBI-së, Naim Aliu zhvilloi takim me Drejtorin Rajonal të Policisë në Gjilan

Kryetari i Këshillit të Bashkësisë Islame (KBI), Naim Aliu, me ftesë të Drejtorit Rajonal të Policisë në Gjilan, kolonel Agron Rukiqi, zhvilloi një takim zyrtar dhe miqësor në ambientet e Drejtorisë Rajonale të Policisë në Gjilan.

Gjatë këtij takimi u diskutua për bashkëpunimin e deritanishëm ndërmjet Këshillit të Bashkësisë Islame dhe institucioneve të sigurisë, me theks të veçantë në ruajtjen e rendit, qetësisë dhe sigurisë publike në rajon. Të dy bashkëbiseduesit vlerësuan lart koordinimin institucional dhe angazhimin e përbashkët në shërbim të qytetarëve.

Kryetari Aliu shprehu gatishmërinë e KBI-së për të vazhduar bashkëpunimin me institucionet e sigurisë në funksion të promovimit të vlerave të bashkëjetesës, tolerancës dhe stabilitetit shoqëror. Ndërkaq, kolonel Rukiqi falënderoi për bashkëpunimin korrekt dhe konstruktiv, duke theksuar se komunikimi i rregullt me përfaqësuesit fetarë ka ndikuar pozitivisht në ruajtjen e një ambienti të qetë dhe stabil në rajonin e Gjilanit.

Në përfundim të takimit, në shenjë vlerësimi për bashkëpunimin dhe kontributin e dhënë në forcimin e bashkëpunimit institucional, kolonel Agron Rukiqi e nderoi Kryetarin Naim Aliu me një mirënjohje, duke shprehur falënderim për rolin dhe angazhimin e tij në shërbim të komunitetit dhe sigurisë publike. /2LONLINE/