Kryetari i Kamenicës shtron iftar të përbashkët për Këshillin e Bashkësisë Islame në Kamenicë

Kyetari i Komunës së Kamenicës, Kadri Rahimaj, shtroi një iftar të përbashkët për administratën e Këshillit të Bashkësisë Islame Kamenicë, imamët e saj, si dhe për delegacionin e Bashkësisë Islame të Kosovës.

Ky iftar u organizua në frymën e muajit të shenjtë të Muajit të Ramazanit, duke theksuar rëndësinë e solidaritetit, bashkëpunimit dhe respektit ndërmjet institucioneve dhe komunitetit fetar.

Gjatë këtij takimi miqësor, kryetari Rahimaj falënderoi përfaqësuesit e Bashkësisë Islame për rolin e tyre të rëndësishëm në ruajtjen e vlerave shpirtërore, në forcimin e harmonisë ndërfetare dhe në shërbim të qytetarëve të komunës së Kamenicës. Ai theksoi se bashkëpunimi ndërmjet institucioneve lokale dhe komuniteteve fetare është i rëndësishëm për ndërtimin e një shoqërie më të bashkuar dhe më solidare.

Nga ana e tyre, përfaqësuesit e Bashkësisë Islame shprehën mirënjohje për këtë pritje dhe për mbështetjen institucionale, duke theksuar rëndësinë e dialogut dhe bashkëpunimit në të mirë të komunitetit.

Në fund të iftarit, të pranishmit shprehën urimet më të mira për muajin e Ramazanit, duke uruar paqe, shëndet dhe mirësi për të gjithë qytetarët. /2LONLINE/