Kryetari i Kamenicës prezantoi punën e gjashtëmujorit të parë të vitit 2026
Kryetari i Komunës së Kamenicës, Kadri Rahimaj ka mbajtur sot takimin publik ku ka prezantuar punën dhe aktivitetet e realizuara gjatë gjashtëmujorit të parë të vitit 2026, ku të pranishmit u informuan për investimet, projektet dhe aktivitetet e realizuara në sektorë të ndryshëm.
Rahimaj theksoi se gjashtëmujori i parë i vitit është karakterizuar nga investime të rëndësishme në arsim, infrastrukturë, shëndetësi, zhvillim ekonomik, mirëqenie, rend dhe rregull, si dhe në përfaqësimin e Komunës në aktivitete ndërkombëtare.
Në sektorin e arsimit u veçuan shpërblimi i 24 maturantëve më të mirë me udhëtimin Euro Trip, organizimi i ceremonisë së diplomimit për rreth 200 maturantë, pasurimi i bibliotekave shkollore me 6,750 lektyra dhe romane, inaugurimi i këndit të leximit dhe kabinetit të logopedisë në ShFMU “Sadri Misini”, organizimi për herë të parë i Kupës së Anamoravës në Matematikë, si dhe përgatitjet për zbatimin e mësimit tërëditor.
Në infrastrukturë u prezantuan investimet në rehabilitimin dhe ndërtimin e rrugëve rajonale e lokale, përfshirë rrugën Kolloleq–Dajkoc–Muçivërc, projektin Shipashnicë–Desivojcë, rrugët kufitare, ndërtimin e rrugës qarkore në lagjen “Malësia”, asfaltimin e dhjetëra rrugëve lokale në qytet dhe fshatra, si dhe vazhdimin e punimeve në shtratin e lumit Astrit.
Në sektorin e shëndetësisë u prezantua dhurimi i një autoambulance të re për QKMF-në në Kamenicë.
Sa i përket zhvillimit ekonomik, u prezantuan rezultatet e ndërmarrjes publike lokale “Dardana”, mbështetja financiare për bizneset, subvencionet për kulturë, rini dhe sport, zhvillimi i Parkut të Aventurave, masterplani për Bahçen e Kamenicës, procesi i rindërtimit të kadastrit, skema e kompostimit, ndërtimi i View Point-eve, si dhe çmimi që Komuna e Kamenicës ka fituar për digjitalizim dhe përdorimin e e-shërbimeve.
Në fushën e rendit dhe rregullit u prezantuan aksionet e realizuara në bashkëpunim me institucionet e sigurisë kundër strukturave paralele, puna e Inspektoratit Komunal dhe ndërhyrjet për lirimin e hapësirave publike në qytet.
Në sektorin e mirëqenies u prezantuan investimet në përmirësimin e rrjetit të ujësjellësit për lagjen “Iliria” dhe fshatin Berivojcë, shpërndarja e 122 pakove “Baby Box” për familjet me foshnja të porsalindura, si dhe vendosja e lodrave të reja në disa parqe të komunës.
Gjatë prezantimit u theksua edhe përfaqësimi i Komunës së Kamenicës në Konferencën e Biomasës së Evropës Qendrore (CEBC 2026), ku u prezantuan përvojat dhe projektet komunale në fushën e energjisë dhe zhvillimit të qëndrueshëm.
Në fund të takimit, Kryetari Rahimaj falënderoi qytetarët për pjesëmarrjen dhe diskutimin, duke ritheksuar përkushtimin e Komunës për transparencë, bashkëpunim me qytetarët dhe vazhdimin e realizimit të projekteve që ndikojnë drejtpërdrejt në përmirësimin e cilësisë së jetës në Komunën e Kamenicës, ndërsa për më gjerësisht do të përgatitet raport i detajuar me pyetje dhe përgjigje, thuhet në njoftimin e komunës në lidhje me këtë takim. /2LONLINE/