Kryetari i Gjilanit, kryetar vetëm i subjektit që e përfaqëson

(2LONLINE) – Skandal pas skandali. Kështu mund të përshkruhet qeverisja lokale e LDK-së. Ne shpresuam që kryetari i ri i Gjilanit do sjellë avancim të vlerave dhe frymë demokratike në qytetin tonë. Ne shpresuam, pasi që ai premtoi që Gjilani do të udhëhiqej nga njerëz me bagazh të lartë intelektual, e jo militantë të subjektit të tij. Ne menduam që Gjilani do të jetë vend i prosperitetit, dhe jo vend ku bëhet spastrimi i punonjësve dhe menaxherave në bazë të petkut partiak. Kreu i komunës , po tregon që ende ka nostalgji dhe mendësi të kohës së komunizmit.

Ardhja e tij në pushtet, goditi rënd shumë punonjës, sidomos ata që i përkisnin Partisë Demokratike të Kosovës. U larguan personat të cilët i dhanë për dekada të tëra energji komunës, për ta bërë atë sa më të bukur. Por, ja që e mira shuhet kur diferencuesit të udhëheqin. Diferencimet fetare ndodhën në kohën e Martin Luterit. Diferencimet racore ndodhën në kohën e Mandelës. Diferencimet etnike e politike në kohën e Millosheviqit. Ndërsa tani diferencimet politike po ndodhin gjatë kohës së LDK-së.

Edhe sa do vazhdojnë kështu. Edhe sa kohë u ka mbetur, të ushtrojnë presion mbi punonjësit e drejtorët e partive tjera. Edhe sa kohë do të përdorin metoda për të ushtruar dhunë psikike, dhe për t’ia pamundësuar atyre lirinë e punës në ambientin ku ata ushtrojnë veprimtarin e tyre profesionale, (ndalja e buxhetit, inspektorët, dhuna sistematike psikike …etj).

Kryetari i Komunës po harron që ish kryetari i komunës z.Qemajl Mustafa prej 32 drejtorëve të shkollave fillore e të mesme, 16 prej tyre ishin të LDK-së. Në qoftë se dëshiron, t’i argumentojë, sepse këtu u ndala në një shembull konkret.

Ju më mirë është të edukoni drejtorët e emëruar me dekret nga ana juaj, që nuk po përtojnë të shpërndajnë grushte kundrejt prindërve, dhe ti leni rehat njerëzit ta bëjnë punën siç dinë ata. Bëhuni me veprime kryetar i Gjilanit, sepse për momentin jeni vetëm kryetar i subjektit që ju përfaqësoni.

/Drilon MILAZIMI/