Kryetari Hyseni: Stërvitjet ushtarake të Serbisë pranë kufirit me Kosovën janë shqetësuese dhe provokuese

Kryetari i Komunës së Gjilan, Alban Hyseni, ka reaguar ndaj zhvillimit të stërvitjeve ushtarake të Serbisë pranë kufirit me Republikën e Kosovës, përkatësish në fshatrat shqiptare Breznicë, Muhoc e tjera (afër Karaçevës), duke i cilësuar ato si shqetësuese dhe provokuese për qytetarët e kësaj komune.

Në një deklaratë publike, Hyseni theksoi se prania e forcave ushtarake, mjeteve ajrore dhe aktiviteteve të tilla në afërsi të zonave të banuara krijon pasiguri dhe tension të panevojshëm.

Sipas tij, këto zhvillime ndikojnë drejtpërdrejt në jetën e përditshme të qytetarëve dhe cenojnë ndjenjën e sigurisë.

“Qytetarët tanë meritojnë qetësi, siguri dhe perspektivë, jo frikë dhe presion,” u shpreh Hyseni, duke shtuar se si kryetar i komunës ndjen shqetësim të thellë për situatën e krijuar.

Ai u bëri thirrje institucioneve vendore dhe ndërkombëtare që të monitorojnë me kujdes situatën dhe të ndërmarrin hapa konkretë për garantimin e sigurisë dhe stabilitetit në rajon.

Kryetari i Gjilanit theksoi se institucionet lokale do të vazhdojnë të qëndrojnë pranë qytetarëve dhe të angazhohen për mbrojtjen e interesave të tyre, në funksion të ruajtjes së qetësisë dhe stabilitetit në komunë.  /2LONLINE/