Kryetari Hyseni: Shihemi së shpejti në stadium!

Organi Shqyrtues i Prokurimit (OSHP) ka refuzuar si të pabazuar ankesën e operatorit ekonomik lidhur me aktivitetin e prokurimit për ndërtimin e stadiumit të qytetit të Gjilanit.

Kryetari i Komunës së Gjilanit, Alban Hyseni ka thënë se pas shumë vitesh padrejtësi, sot është marrë vendimi për Stadiumin e Gjilanit që të gjithë po e prisnin me padurim.

Ai tha se vendimi i OSHP-së i hap rrugë realizimit të këtij projekti madhor.

“Tashmë nuk ka më dilema: procedurat ecin përpara dhe Gjilani do ta ketë stadiumin që i takon, sipas standardeve të UEFA-s, ashtu siç kemi premtuar. Ne nuk ndalemi. Për krenarinë tonë, për qytetin e sportit e sportistëve, shihemi së shpejti në stadium”, ka thënë i pari i Gjilanit, Alban Hyseni.

Ai ka shtuar se ka edhe një lajm tjetër të mirë. “Projekti i stadiumit do të ndryshohet, do të mbulohet i tëri e do të bëhet më modern, tashmë është krijuar grupi punues”. /2LONLINE/