Kryetari Hyseni: Restaurimi i objekteve të trashëgimisë kulturore është angazhim për ruajtjen e identitetit të qytetit

Kryetari i Komunës së Gjilanit, Alban Hyseni, ka bërë të ditur se gjatë ditës së sotme ka pritur në takim ministren e Kulturës, Saranda Bogujevci, si dhe zëvendësministren Nora Arapi, me të cilat kanë vizituar disa objekte të trashëgimisë kulturore në qytet.

Hyseni tha se fillimisht është vizituar objekti i restauruar i ish-Teknikës Popullore, ku është bërë edhe pranim-dorëzimi simbolik i çelësave, si një hap drejt rikthimit të objektit në funksion dhe në shërbim të komunitetit, transmeton 2LONLINE.

Më pas, kanë vizituar edhe shtëpinë 136-vjeçare të Zekrija Abdullahut, shtëpi e vjetër e qytetit dhe një dëshmi e rëndësishme e historisë urbane të Gjilanit.

“Ruajtja dhe restaurimi i këtyre objekteve është angazhim i përbashkët për të mos lejuar që vlerat tona kulturore të mbeten në harresë”, ka deklaruar Hyseni.

Ai ka falënderuar ministren dhe ekipin e saj për vizitën dhe përkushtimin ndaj ruajtjes së trashëgimisë kulturore në Gjilan. /2LONLINE/