Kryetari Hyseni priti në takim nxënësin Beson Rrahmani, i suksesshëm në Garën Ndërkombëtare të Matematikës së Aplikuar “AMC Competition”

Kryetari i Komunës së Gjilanit, Alban Hyseni priti sot në takim nxënësin Beson Rrahmani, i cili ka shënuar një sukses të jashtëzakonshëm në Garën Ndërkombëtare të Matematikës së Aplikuar “AMC Competition”.

Besoni është renditur i treti në botë në kategorinë “Junior Primary”, në mesin e më shumë se 1,000 pjesëmarrësve nga vende të ndryshme të botës, duke u vlerësuar me titullin Kampion i Artë.

Sipas të parit të Komunës,  u vlerësua lartë kjo arritje, e cila përbën një krenari për Gjilanin dhe Kosovën, si dhe një dëshmi e talentit, punës dhe përkushtimit të nxënësve tanë.

Kryetari i Komunës shprehu mirënjohje për familjen e Besonit, mësuesen Adriana Shala për përkushtimin e saj, si dhe Shkollën Fillore “Musa Zajmi” për mbështetjen e vazhdueshme.

“Komuna e Gjilanit mbetet e përkushtuar në mbështetjen e nxënësve dhe të rinjve të talentuar, duke krijuar mundësi për zhvillimin e tyre dhe përfaqësimin sa më dinjitoz të qytetit dhe Kosovës në arenën ndërkombëtare. Urime Besonit për këtë sukses të jashtëzakonshëm dhe shumë suksese të tjera në rrugëtimin e tij”, ka thënë kryetari Hyseni.   /2LONLINE/