Kryetari Hyseni mirëpret miratimin e vendimit për shpronësimin e pronave të qarkores së vjetër të Gjilanit

Miratimi i  vendimit përfundimtar nga Qeveria e Kosovës, për shpronësim për interes publik të pronave të paluajtshme të pronarëve dhe zotëruesve të interesit të cilat preken nga realizimi i Projektit “Qarkorja e Vjetër e Qytetit të Gjilanit, Llot 1 dhe Llot 2, zonat kadastrale Shillovë, Livoç i Ulët dhe Gjilan, Komuna e Gjilanit, është mirëpritur nga Komuna e Gjilanit.

 Kryetari i Komunës së Gjilanit, Alban Hyseni, tha se ndihet tejet i lumtur që më në fund po marrin fund problemet pronësore që datojnë që nga vitet e paraluftës në qarkoren e vjetër të qytetit.

Ai tregoi se në mbledhjen e 19-të të Qeverisë së Kosovës, Qeveria Kurti III, është votuar shpronësimi i këtyre pronave, ku qytetarët të cilëve u është marrë prona do të kompensohen, duke i hapur kështu rrugë Komunës së Gjilanit për realizimin e projektit për zgjerimin dhe modernizimin e kësaj zone.

“Dua ta falënderoj përzemërsisht kryeministrin Albin Kurti, ish-ministrin Liburn Aliu, ish-ministrin Hysen Durmishi, si dhe ministren Fitore Pacolli për mbështetjen e parezervë, pavarësisht të gjitha sfidave që kanë qenë gjatë këtij procesi”, tha Alban Hyseni.

I pari i Gjilanit,  më tej tregoi se me këtë vendim, Komunës së Gjilanit i janë kursyer së paku 20 milionë euro nga vendimet gjyqësore për shpronësim.  /2LONLINE/