Kryetari Hyseni fton qytetarët në shesh për të parë bashkë ndeshjen Kosovë–Turqi

Kryetari i Komunës së Gjilanit, Alban Hyseni, ka ftuar qytetarët që nesër mbrëma të mblidhen në qendër të qytetit për të ndjekur së bashku ndeshjen e shumëpritur ndërmjet Kosovës dhe Turqisë, në kuadër të finales së play-off-it për një vend në Kupën e Botës.

Duke qenë se biletat për stadiumin “Fadil Vokrri” janë shitur të gjitha, Komuna e Gjilanit ka vendosur që përmes një ekrani të madh, e vendosur në sheshin e qytetit, ta shohim ndeshjen, në mënyrë që qytetarët të përjetojnë atmosferën sportive së bashku.

“Nesër është dita e madhe. Kosova jonë luan finalen e play-off-it kundër Turqisë për një vend në Kupën e Botës. Meqenëse biletat në stadium janë shitur të gjitha, ne kemi vendosur që atmosferën e stadiumit ta sjellim në zemër të qytetit tonë”, ka deklaruar Hyseni.

Sipas njoftimit, kjo do të organizohet të martën, në Sheshin “Agim Ramadani” (Platoja e Teatrit), duke filluar nga ora 20:45.

Kryetari i komunës u bëri thirrje të gjithë qytetarëve që t’i bashkohen këtij organizimi dhe të përkrahin përfaqësuesen e Kosovës në këtë përballje të rëndësishme.

“Ju ftoj të gjithëve që ta ndjekim këtë përballje historike në ekranin e madh. Forca Kosova!”, ka shtuar ai.  /2LONLINE/