Kryetari Hyseni: Drita shkruan historinë për Kosovën

Kampioni i Kosovës, Drita nga Gjilani, është kualifikuar në raundin e dytë të Ligës së Kampionëve.

Ajo triumfoi si mysafire në ndeshjen e kthimit kundër Differdange në Luksemburg (3:2), duke vulosur fitoren dhe kualifikimin e merituar me rezultat të përgjithshëm 4:2.

Drita u bë skuadra e parë kosovare që arrin një sukses të tillë në garën më prestigjioze të futbollit evropian.

Drita në raundin e dytë do të luaj kundër skuadrës së njohur daneze, FC Copenhagen.

Kryetari i Komunës së Gjilanit, Alban Hyseni, tha se nën qiellin e Differdange, sonte nuk u zhvillua vetëm një ndeshje – u shkrua historia.

“FC Drita, u bë klubi i parë nga Kosova që kalon në raundin e dytë të Ligës së Kampionëve, duke shënuar një arritje madhështore për klubin, qytetin dhe gjithë vendin tonë”, tha Alban Hyseni.

I pari i Gjilanit falënderoi ekipin, stafin dhe çdo zemre që besoi. /2LONLINE/