Kryetari Hyseni: Bashkëpunimi me OSBE-në mbetet i rëndësishëm

Kryetari i Komunës së Gjilanit, Alban Hyseni, ka zhvilluar një takim me Shefin e Misionit të OSBE-së në Kosovë, Gerard McGurk, ku është diskutuar për bashkëpunimin institucional dhe projektet e përbashkëta në interes të qytetarëve.

“Sot zhvilluam një bashkëbisedim të rëndësishëm me Shefin e Misionit të OSBE-së në Kosovë, ambasadorin Gerard McGurk, ku diskutuam për bashkëpunimin institucional dhe projektet e përbashkëta që kanë ndikim të drejtpërdrejtë në jetën e qytetarëve tanë”, ka thënë Hyseni.

Sipas tij, fokus i veçantë i takimit ishte puna me komunitetet jo-shumicë, avancimi i politikave të barazisë gjinore, si dhe mbështetja dhe fuqizimi i të rinjve në shoqëri dhe në proceset e vendimmarrjes.

“Bashkëpunimi me OSBE-në vazhdon të jetë i rëndësishëm në forcimin e kapaciteteve institucionale dhe në realizimin e nismave që promovojnë barazi dhe zhvillim demokratik”, ka theksuar i pari i Gjilanit, Alban Hyseni.  /2LONLINE/