Kryetari Haziri iu jep një lajm të mirë familjes Marovca

(2L ONLINE) – Kryetari i Komunës së Gjilanit Lutfi Haziri, ka vizituar sot familjen e Zijadin Marovcës, e cila vuan nga mungesa e banimit, duke iu konfirmuar lajmin e mirë se nesër do të nisë ndërtimi i shtëpisë së tyre, që është donacion nga bashkatdhetari ynë në Zvicër, Ruzhdi Bunjaku.

Kreu i Komunës së Gjilanit, i cili shoqërohej nga kryesuesja Valentina Bunjaku-Rexhepi, ka thënë se me fillimin e ndërtimit të shtëpisë së Zijadin Marovcës, nisë edhe zyrtarisht implementimi i projektit të Komunës së Gjilanit për të zgjidhur problemet qytetarëve që vuajnë nga problemet e banimit.

Numri i shtëpive që janë premtuar nga qytetarët e vullnetit të mirë në mbrëmjen humanitare të organizuar nga Komuna e Gjilanit me moton “Pak nga ne, shumë për ata”, ka qenë nëntë, ndërsa sot është siguruar edhe donacioni për ndërtimin e shtëpisë e dhjetë, e cila do të nis të ndërtohet në ditën e nesërme.

“Që nga marrja e detyrës së kryetarit të Komunës, kam vënë prioritetet për zgjidhjen urgjente të problemeve të banimit në Gjilan. Tashmë, po e implementojmë këtë projekt të madh të Komunës dhe kjo tregon për shpirtin e madh të LDK-së që t’i dalim në ndihmë nevojtarëve. Më gëzon shumë fakti që në ditëlindjen time, sot është gëzuar edhe familja Marovca, e cila shumë shpejt do të bëhet me shtëpi të re, falë bashkatdhetarit tonë në Zvicër, Ruzhdi Bunjaku, i cili ka marrë përsipër ta kryej këtë punë nga kursimet e familjes së tij. Me këtë logjikë të qeverisjes do të vazhdojmë dhe brenda mandatit katër vjeçar do t’i zgjidhimin të gjitha problemet e banimit në Komunën e Gjilanit”, ka thënë, Haziri.

Nga ana e tij, Zijadin Marovca, ka thënë se falënderon kryetarin Haziri për humanitetin e tij që po e tregon në mënyrë të vazhdueshme me familjet në nevojë.

“Qysh pe shifni edhe vetë, na kena jetue n’kushte shumë t’randa deri tash…Faliminer shumë prej kryetarit që e ka ndërmarrë këtë aksion me na i maru shpijat. S’kam fjalë qysh me e përshkrue gëzimin tem edhe të familjes”, ka thënë Marovca , që ka 8 anëtarë të familjes, të moshës prej 3-14 vjeçare. /2L ONLINE/