Kryetari Haliti prezantoi të arriturat e gjashtë mujorit të parë

/2L ONLINE/ – Kryetari i komunës së Vitisë Sokol Haliti, ka prezantuar punën e 6 mujorit të parë për këtë vit, duke veçuar rezultatet e arritura, sfidat dhe planet në të ardhmen.

Ai këtë e ka bërë përmes një konference shtypi ku ka thënë se Qeveria komunale në vazhdimësi ka mbajtur raportet me mediat në pasqyrimin e gjendjes reale të zhvillimeve nëpër drejtoritë komunale.

Duke folur për projektet në komunën e Vitisë, kryetari Haliti tha se që nga muaji I tretë veç kanë filluar punët në realizimin e projekteve, që një pjesë janë në përfundim e sipër, një pjesë tjetër janë në realizim, por që edhe projekte që do të fillojnë së shpejti.

Në këtë kontest, ka përmendur projektet që janë duke u realizuar dhe ato që do të nisin në Ramjan, Sllatinë, Sadovinë të Çerkezëve, Beguncë, Ballancë, Budrikë, Radivojc etj.

Ndërkaq lidhur me projektet e rrugëve magjistrale Gërlicë-Kllokot dhe ajo Kllokot-Ferizaj, bëri të ditur se do të nisin së shpejti por pengesë për këtë kanë qenë çështjet procedural dhe afatet e ankesave.

Sa i përket projekteve që kanë të bëjnë me rregullimin e ambientit, kryetari Haliti përmendi rregullimin e parqeve në viti, ndërsa ka përmendur fillimin e projektit të parkut në Pozheran gjatë ditëve në vazhdim.

Ai u shpreh se edhe pastrimi i lumit Morava në Viti, e posaçërisht rregullimi i shtratit të përroskës në Skifteraj, janë punë që kanë kërkuar intervenim të domosdoshëm.

“Për gjatë këtyre 6 muajve të parë të këtij viti, por njëkohësisht edhe gjatë vitit të kaluar, qeveria lokale që unë drejtoj ka qenë e përkushtuar që të bëjë rehabilitimin në të gjitha aspektet. Por, një gjë që është me rëndësi për të përmendur është ajo se komuna e Vitisë është ranguar ndër komunat më të mira sa I përket zbatimit të ligjeve, gjë që tregon angazhimin tonë profesional”, ka thënë Haliti.

Edhe bashkëpunimin me këshillat e fshatrave e ka vlerësuar shumë lartë, përmes të cilëve po mban kontakte të mira në identifikimin e problemeve dhe nevojave të qytetarëve.

Kurse lidhur me raportin e auditimit, ka thënë se janë cilësuar shkelje të vogla e që në fakt ajo për gabimet e llogaritjeve në pushimet e lehonisë, është kompetencë e nivelit qendror dhe nuk mund të konsiderohet si shkelje e autoriteteve komunale.

Në këtë konferencë kryetari Haliti ka përmendur edhe përgatitjet në sektorin e gjendjes civile për pritjen e fluksit të mërgimtarëve në mënyrë që tu ofrohen shërbime sa më të mira për pajisje me dokumente.

Kryetari Haliti, i është përgjigjur edhe pyetjeve të gazetarëve që kanë qenë të shumta, ndërkohë që për planet në të ardhmen ka theksuar se Vitia do të jetë një vend punishte e që do të nisin shumë projekte në ujësjellës, kanalizim, infrastrukturë rrugore e shkollore etj. /2L ONLINE/