Kryetari Alban Hyseni vizitoi Pajazit Zymerin i vlerësuar me titullin “Nderi i Qytetit”

“Sot patëm nderin të vizitojmë patriotin e madh Pajazit Zymeri, të cilin e vlerësuam me titullin “Nderi i Qytetit” – një shenjë mirënjohjeje për jetën dhe veprën e tij të jashtëzakonshme në shërbim të çështjes kombëtare”, ka thënë Alban Hyseni, kryetar i komunës së Gjilanit.

Ai bëri me dije se Baca Pajazit, që në vitin 1969 iu bashkua Ballit Kombëtar në Austri, vazhdoi aktivitetin e tij patriotik në Lëvizjen Popullore në diasporë, duke bashkëpunuar me figura të njohura si Kadri Zeka dhe Ibrahim Kelmendi. Mori pjesë në demonstratat historike të vitit 1981 në Zvicër, u përball me arrestime e tortura, por kurrë nuk u tërhoq nga rruga e lirisë.

“Kontributi i tij shtrihet nga ndihma për bashkatdhetarët në mërgim, te mbështetja financiare për fondin “Vendlindja Thërret”, e deri te pjesëmarrja si luftëtar i Ushtrisë Çlirimtare të Kosovës në Brigadën 121 gjatë Betejës së Pashtrikut. Nderim e mirënjohje të përjetshme për veprën e tij patriotike’, ka thënë kryetari Hyseni.  /2LONLINE/