Kryesuesja e KK-së përgëzon qendrën “Pema” për punën e jashtëzakonshme me fëmijët me nevoja të veçanta

/2L ONLINE/ – Qendra e Kujdesit Ditor “Pema” në Gjilan, e cila trajton të gjitha kategoritë e fëmijëve me nevoja të veçanta, ka shënuar sot dy vjetorin e themelimit, në të cilin aktivitet ka marrë pjesë edhe kryesuesja e Kuvendit Komunal, Valentina Bunjaku Rexhepi.

Në mesin e përfaqësuesve të kësaj qendre, fëmijëve dhe prindërve, kryesuesja Bunjaku Rexhepi i ka përgëzuar për punën e madhe që kanë bërë brenda dy vitesh, duke siguruar mbështetjen institucionale për qendrën “Pema”.

“Ju uroj dy vjetorin e themelimit të qendrës suaj dhe ju përgëzoj për punën e jashtëzakonshme që keni bërë për t’i dalë në ndihmë fëmijëve të Gjilanit. Dua t’ua konfirmoj mbështetjen e Komunës së Gjilanit në mënyrë që qendra “Pema” të funksionoj sikurse edhe qendrat tjera të cilat i subvencionon Komuna. Ju kam vizituar disa herë dhe jam e njoftuar për nevojat tuaja”, tha zonja Bunjaku Rexhepi.

Nga ana e saj, koordinatorja e Qendrës së Kujdesit Ditor “Pema”, Festa Demiri, ka falënderuar kryesuesen e Kuvendit për mbështetjen dhe zotimin që t’i dalë në ndihmë Komuna e Gjilanit në aspektin financiar.

Ndryshe, kryetari i Komunës së Gjilanit Lutfi Haziri që në fillim të vitit 2015 ka nënshkruar marrëveshje financimi me “Handikos”-in, Shoqatën e të Verëbërve dhe atë të Shurdhmemecëve, derisa ka paralajmëruar për ndihmën e Komunës së Gjilanit edhe për shoqatat tjera, të cilat janë jetike në shërbim të qytetarëve të Gjilanit. /2L ONLINE/