Kryesuesi i KGJK-së priti në takim kryetarin e Gjykatës Themelore të Gjilanit
Kryesuesi i Këshillit Gjyqësor të Kosovës (KGJK), Rrustem Thaqi, priti sot në takim kryetarin e Gjykatës Themelore të Gjilanit, Venhar Salihu.
Me këtë rast, kryetari Salihu e uroi kryesuesin Thaqi për marrjen e detyrës së re, duke i dëshiruar suksese në ushtrimin e mandatit dhe përmbushjen e përgjegjësive në krye të KGJK-së.
Gjatë takimit u diskutua për zhvillimet aktuale në sistemin gjyqësor dhe sfidat me të cilat përballen gjykatat, duke u theksuar rëndësia e koordinimit të vazhdueshëm ndërmjet KGJK-së dhe gjykatave, si dhe nevoja për adresimin e sfidave të përbashkëta me synim rritjen e efikasitetit, llogaridhënies dhe transparencës në sistemin gjyqësor.
Po ashtu, bashkëbiseduesit ritheksuan përkushtimin për të vijuar angazhimin e përbashkët në avancimin e reformave, rritjen e cilësisë së shërbimeve gjyqësore dhe forcimin e besimit të qytetarëve në institucionet e drejtësisë. /2LONLINE/