Kryeministri i Kosovës, Isa Mustafa, pas vizitës që ka zhvilluar në Komunat e Novobërdës dhe Gjilanit, ka zhvilluar një drekë pune me kryetarët e komunave të regjionit të Gjilanit, përkatësisht me kryetarët e Gjilanit, Kamenicës, Vitisë, Ranillugut, Novobërdës dhe Parteshit.
Gjatë takimit, kryeministri Isa Mustafa ka biseduar me kryetarët e këtyre komunave për problemet dhe kërkesat e tyre, si dhe për nevojat e përbashkëta për zhvillimin e këtij rajoni.
Mustafa i njoftoi kryetarët për hapat që do të ndërmerren nga Qeveria e Kosovës për zhvillimin e ekonomik e social, investimet në infrastrukturë, në ambient, e në fusha të tjera.
Ai shprehu përkrahjen për këto Komuna, duke theksuar se në bashkëpunim dhe në përputhje me mundësitë do të bëhen përpjekje maksimale për të shtyrë përpara agjendën e zhvillimit në këtë zonë.
Në këtë kontekst, kryeministri Mustafa i ka inkurajuar kryetarët që të koordinojnë projektet e tyre, pasi që projektet janë shumë me efiçiente kur bëhen në koordinim ndërmjet komunave fqinje dhe se shumë projekte mund të prekin disa komuna, siç janë shtretërit e lumenjve apo infrastruktura rrugore, etj.
Kryetarët e Komunave të rajonit të Gjilanit, shprehën pikëpamjet e tyre për prioritetet dhe çështjet kryesore të cilat duhet të adresojnë në bashkëpunim me Qeverinë e Kosovës, duke falënderuar kryeministrin Isa Mustafa për përkrahjen e ofruar.
Të pranishëm në këtë takim ishin edhe ministri i Bujqësisë, Memli Krasniqi dhe ministri i Shëndetësisë, Imet Rrahmani, të cilët bashkëbiseduan me kryetarët e komunave si dhe ofruan përkrahjen e tyre për avancimin e këtyre dy fushave shumë të rëndësishme.