Kryeministri Mustafa viziton Fabrikën e Radiatorëve “Enrad”

/2L ONLINE/ – Kryeministri i Republikës së Kosovës, Isa Mustafa, i shoqëruar me ministra të kabinetit qeveritar, ka vizituar sot Komunën e Gjilanit dhe njëra ndër ndalesat e tij ishte edhe vizita në Fabrikën e Radiatorëve “Enrad”. Gjatë vizitës në Fabrikën “Enrad”, e cila pas privatizimit ka të punësuar mbi 200 punëtorë dhe eksporton në dhjetë vende të ndryshme, kryeministri Mustafa u zotua për përkrahje më të madhe në sektorin e prodhimit.

“Këtu pamë një shembull të një privatizimi i cili ka shkuar mjaft vështirë, por për fat të mirë i cili është treguar shumë i suksesshëm falë një ndërmarrësie dhe një insistimi që firma të aktivizohet. Sot kemi pjesëmarrjen e kësaj firme në tregun regjional dhe në tregun evropian, eksportin e produkteve mbi dhjetë vende, që është për ne e rëndësisë themelore. Kemi një përmirësim maksimal të cilësisë dhe të konkurrencës, sepse pa qenë konkurrente është vështirë të eksportohet jashtë, dhe po ashtu kemi një ringjallje të sektorit të prodhimit i cili në Kosovë na mungon dhe për të cilin jemi shumë të interesuar që ta përkrahim”, tha kryeministri.

Kryeministri Mustafa, po ashtu, tha se do të shikohet edhe çështja e importimit të materialit i cili nuk prodhohet në vend dhe që shfrytëzohet për këto produkte, në mënyrë që të zbutet konkurrenca me vendet fqinje.

“Natyrisht duhet një përkrahje më e mirë e sektorit bankar përmes kredive më cilësore dhe më të përshtatshme për sektorin e prodhimit për të cilin ne jemi të interesuar që ta zhvillojmë”, tha kryeministri.

Pronari i Fabrikës “Enrad”, Mejdi Rexhepi, falënderoi kryeministrin për vizitën, duke e cilësuar si inkurajim që tash e tutje të punohet edhe më shumë në rritjen e kapaciteteve por edhe të biznesit në përgjithësi. /2L ONLINE/