Kryeministri Mustafa priti përfaqësues të komunitetit goranë

Kryeministri i Republikës së Kosovës, Isa Mustafa, ka pritur sot një delegacion të komunitetit goran të Kosovës, të cilët i ka uruar për Ditën e këtij komuniteti, që shënohet më 6 maj

Kryeministri, siç njoftoi kabineti i tij, ka vlerësuar angazhimet e përbashkëta të komuniteteve në ndërtimin e Republikës së Kosovës dhe ka theksuar përkushtimin e Qeverisë për të përkrahur të gjitha komunitetet pakicë, përfshirë edhe atë goran, për integrimin e plotë në shtetin dhe në shoqërinë kosovare, njofton kumtesa kryeministrore.

Mustafa po ashtu ka vlerësuar se komunitetet pakicë janë tregues i harmonisë ndëretnike e ndërfetare, si dhe multikulturalizmit në Republikën e Kosovës.

Përfaqësuesit e komunitetit goran, të cilët kanë përfaqësuar një numër të organizatave joqeveritare, kanë shprehur angazhimet për fuqizimin e rolit të tyre në shtetin e Kosovës, duke shprehur edhe shqetësimet e tyre aktuale.

Ata kanë ftuar kryeministri që të vizitojë vendbanimet e tyre dhe që të ofrohet më shumë përkrahje e të fuqizohet bashkëpunimi me këtë komunitet.