Kryeministri Kurti: Protokolli Shtetëror për Trajtimin e Rasteve të Dhunës Seksuale do t’u dalë në ndihmë dhe mbrojtje viktimave

Protokolli Shtetëror për Trajtimin e Rasteve të Dhunës Seksuale, është një dokument pune për tu përdorur nga të gjitha institucionet përgjegjëse për trajtimet e rasteve të dhunës seksuale, tha Kryeministri i Republikës së Kosovës, Albin Kurti, në ceremoninë e lansimit të tij.

Ky Protokoll Shtetëror synon të qartësojë të gjitha institucionet përgjegjëse se nuk ka rëndësi nëse viktima apo e mbijetuara kontakton së pari në urgjencë, denoncon rastin në polici, kontakton me mbrojtësin e viktimave apo kërkon ndihmë në një qendër të specializuar të shërbimeve për gratë e dhunuara, tha Kryeministri Kurti.

Ai theksoi se e rëndësishme është që pavarësisht se cili institucion merr informacionin e parë për rastin, duhet të fillojë menjëherë trajtimi me përgjegjshmëri dhe profesionalizëm dhe duhet të përmbushen të gjitha nevojat specifike të viktimave nëpërmjet qasjes shumë-sektoriale e të koordinuar.

Shpeshherë në rastet e paraqitura institucionet nuk i kanë kryer e nuk i kanë zbatuar obligimet e tyre ligjore, duke i lënë viktimat pa trajtimin që u takon dhe që ato e meritojnë. E po ashtu, në raste të këtilla dhunuesit dhe abuzuesit nuk e kanë marrë dënimin e merituar, tha Kryeministri.

Duke përmendur veprimet e ndërmarra nga Qeveria, ai veçoi ndryshmet ligjore në Kodin Penal dhe Kodin e Procedurës Penale. Kryeministri theksoi ndryshimet në rastet kur një person shpallet fajtor për veprën penale të dhunës në familje apo të dhunës seksuale: do t’i ndalohet punësimi në institucionet publike; do t’i ndalohet kandidimi në pozita qoftë në nivel lokal apo qendror; do t’i merret leja e vozitjes; nuk do të zbatohen rrethanat lehtësuese për dhunuesit; trajtimi i këtyre lëndëve nuk do të zgjasë më shumë se një vit dhe emrat e dhunuesve do të publikohen ne faqen zyrtare të KGJK-së.

Pas këtyre ndryshimeve ligjore, për ashpërsimin e dënimeve ndaj dhunuesve, zbatimi i këtij protokolli, do tu dalë në ndihmë dhe mbrojtje viktimave, theksoi Kryeministri Kurti.

Kryeministri uroi që zbatimi i Protokollit të fillojë dhe të japë rezultatet e menjëhershme të trajtimit të viktimave dhe të mbijetuarve të dhunës seksuale. /2LONLINE/