Kryeministri Kurti mori pjesë në takimin e parë të Komisionit Shtetëror për Rini

Kryeministri Kurti mori pjesë në takimin e parë të Komisionit Shtetëror për Rini

“Që nga marsi i këtij viti kur qytetarët në mënyrë masive na dhanë besimin dhe përgjegjësinë për të qeverisur, bashkë me juve kemi punuar pa ndalur për të vendosur një standard të ri të qeverisjes në vend. Komisioni shtetëror për rini është një tjetër hap drejt atij standardi”, tha kryeministri i Republikës së Kosovës, Albin Kurti në hapje të takimit të parë të Komisionit Shtetëror për Rini.

Kryeministri tha se duhet një qasje gjithëpërfshirëse drejt rinisë që i ndihmon të zhvillojnë njohuritë dhe shkathtësitë, të gjejnë vendin dhe misionin e tyre në shoqëri, të jenë aktiv dhe të shëndetshëm, por edhe kontribuues në shoqëri.

“Në ministritë tuaja ju keni për detyrë t’i jepni vëmendje të veçantë vendimeve që ndikojnë tek të rinjtë si dhe t’i shtyni përpara politikat që përcaktohen si prioritete. Dhe deri në fund të mandatit, ne presim që nën drejtimin tuaj, me përfshirjen e drejtpërdrejtë dhe të plotë të të rinjve, qeveria jonë të ketë në zbatim një strategji të re kombëtare dhe transformuese për rininë”, u tha kryeministri anëtarëve të Komisionit, që kryesohet nga zëvendësministrja e Kulturës, Rinisë dhe Sportit, Daulina Osmani.

Komisioni Shtetëror për Rini, është emëruar në mbledhjen e 24-të të Qeverisë së Republikës së Kosovës, me qëllim të përmirësimit të jetës së të gjithë të rinjve, me mbështetje ndër-institucionale drejt rezultateve konkrete. /2LONLINE.com/

KOMENTE