“Kryeministër, faleminderit që ekziston”!!!
(2LONLINE) – I indinjuar me situatën e krijuar parazgjedhore dhe premtimet e panumërta milionëshe të kryeministrit Hashim Thaçi, si qytetar i këtij vendi nuk po mund të qëndroj indiferent e aq më pak kur mendoj se u shkel e u fye rëndë sedra ime prej studenti.
Rritja e pagave për mësimdhënësit, mjekët, shërbyesit civil; ligji për veteranët e luftës, pesë milionëshi për fëmijët me kancer e tumor; zbritja 50 përqindësh e shërbimeve për studentët; subvencionet për bujqit e premtime megalomane të muajit të fundit do të ishin të mirëseardhura, nëse do të ishin konform akteve ligjore e kushtetuese të Republikës së Kosovës dhe të mos ishin pjesë e një fushate të egër parazgjedhore, kur dihet se shumë shpejtë do të kemi Zgjedhje Parlamentare.
Nëse këto vendime paskan mundur me u marrë, pse nuk u morën më herët?! Pse të gjitha këto vendime erdhën bash në prag të Zgjedhjeve?! A po i bie që përfituesit e këtyre vendimeve kanë pësuar duke pritur ardhjen e Zgjedhjeve vetëm që ju kryeministër të Përfitoni mandatin tjetër qeverisës nga këto vendime?! A është kaq i rëndësishëm për ju posti i kryeministrit, sa të luash me ndjenjat e 2 milion qytetarëve të Kosovës?! Çka në fakt është morali në politikë, pasi e kam shumë të paqartë këtë?!
Vendimin për zbritjen në 50% të shërbimeve të studentëve (semestri, mensa e konvikti), e mirëprita jashtëzakonisht mirë pasi i ndihmon gjendjes ekonomike të familjes sime, nëse do të mbetej si i tillë normalisht. Por, nëse e marrin parasysh faktin se për të ardhur ky vendim u desh të pritej koha e Zgjedhjeve, padyshim paraqet fyerje për mua dhe për kolegët e mi studentë.
Z. kryeministër, a i din problemet me të cilat përballen studentët? A e dini që ende mësojmë me skripta pasi nuk keni ndarë buxhet të mjaftueshëm për përkthim e botim të literaturës adekuate? A e dini që nuk keni ndarë buxhet më të madh për UP-në ani se numri i studentëve është rritur? A i dini kushtet e vështira me të cilat përballen konviktorët? Po për pranimin e studentëve pa kritere? Po për diplomat e falsifikuara të profesorëve të UP-së?
Z. kryeministër, po kuptohet tani qartë që ky vendim e vendime të tjera që po i merrni në këtë kohë i takojnë vetëm një fushate t’paskrupullt parazgjedhore; por a nuk të erdhi turp të u’a kërkosh votën studentëve në Universitetin e Prizrenit në mënyrë direkte, përbrenda institucionit të dijes?! Po arrestimi e grushtimi i disa studentëve që reaguan kur paturpësisht shkove t’i vizitosh në menzën e studentëve?!
Kështu tregon përkushtimin tënd për ne studentët?! Duke kërkuar votën a?!Ky është përkushtim?!
Për çka themelove Universitetin e Gjilanit, Prizrenit e Pejës (po pretendon edhe atë të Podujevës e Ferizajt), duke e ditur shumë mirë për mungesën e stafit akademik dhe për një mori mangësish e defektesh?! Që të zvogëlosh numrin e të papunëve në Kosovë e rrjedhimisht edhe numrin e të paknaqurve me gjendjen ekonomike e me qeverisjen tuaj, apo jo?!
Unë po i kujtoj fjalët e t’madhit Sokrat i cili thoshte “Dëshmitari im kryesor që flas të vërtetën është varfëria ime”. Gjendja e rëndë ekonomike e sociale, papunësia e madhe, niveli i lartë i varfërisë, niveli i lartë i korrupsionit, mungesa e një sistemi gjyqësor të pavarur, mungesa e shprehjes së lirë janë dëshmitarë që ju zotëri kryeministër nuk jeni i aftë të udhëhiqni me qeverinë e Republikës së Kosovës. Ju mund të jeni i zoti që të fitoni edhe mandatin e tretë, duke shfrytëzuar aftësinë tuaj manipulative me opinionin dhe qytetarin e rënduar nga varfëria , por jam i sigurtë se nuk jeni i duhuri të udhëhiqni qeverinë e Republikës së Kosovës.
Mua, nuk më mbetet tjetër pos ti bashkëngjitëm vagonit të gjatë të qytetarëve pasiv dhe të them që ju jeni “kryeministri më i mirë”, “lider i pakontestueshëm e i pakrahasueshëm”, “mbret i mbretërve”, “shpresa e së ardhmes”…
Kështu që, “Kryeministër, falemnderit që egziston”!
/Adem AJVAZI/