Kreu i Vitisë takon kryeshefin e KRU “Hidromorava”, bisedohet për çështjen e ujit të pijshëm në territorin e kësaj komune

Kryetari i Komunës së Vitisë, Sokol Haliti me bashkëpunëtorë kanë pritur sot në një takim, Ymer Salihu, kryeshefin e Kompanisë Rajonale të Ujërave “Hidromorava” nga Gjilani.

Gjatë këtij takimi, janë diskutuar çështje të rëndësishme lidhur me sigurimin e ujit të pijshëm për disa fshatra të komunës së Vitisë.

Një nga temat kryesore të bisedës ishte projekti i ujësjellësit që do të implementohet në fabrikën e ujit në Letnicë, ku pritet të investohen miliona euro nga projektin “Flows”.

Po ashtu, është folur edhe për pajisjen me leje të ndërtimit për këtë projekt si dhe për tenderimin e projekteve për eliminimin e defekteve në lokalitetet si Sllatinë e Epërme, Sllatinë e Poshtme, Sadovinë e Çerkezve dhe Sadovinë e Jerlive.

Kryetari Haliti ka theksuar rëndësinë e sigurimit të ujit të pijshëm për të gjitha lokalitetet e komunës së Vitisë dhe u bë me dije se komuna po punon për përgatitjen e një projekti të ri për sigurimin e ujit të pijshëm për fshatin Beguncë, si dhe për menaxhimin individual të ujit në fshatrat Stubëll i Epërm dhe Goshicë. Po ashtu, është diskutuar për nënshkrimin e një dokumenti të rëndësishëm për menaxhimin e ujësjellësit në Zhiti.

Në fund të takimit, është diskutuar edhe për përpjekjet për të eliminuar defektet ekzistuese në ujësjellësit e disa lokaliteteve të tjera të komunës, me qëllim përmirësimin e shërbimeve për qytetarët.   /2LONLINE/