Kreu i Vetëvendosjes takon ambasadorin britanik

Kryetari i Lëvizjes Vetëvendosje, Albin Kurti, së bashku me ish deputeten Saranda Bogujevci mirëpritën për herë të parë pas ardhjes së tij në detyrën e ambasadorit britanik në Kosovë, z. Nicholas Abbott, i cili shoqërohej nga zyrtarja për demokratizim në ambasadë, znj. Selvije Fetahu.

Në fillim, Kurti e uroi Ambasadorin Abbott për detyrën e sapomarrë duke shpresuar që Kosova dhe ai të mësojnë shumë nga njëri-tjetri.

Përgjatë bisedimit Kurti shprehu shqetësimin se Kosova ka nevojë për reforma me objektiv çkapjen e shtetit dhe luftën kundër korrupsionit e krimit të organizuar. Për luftimin e tyre është i nevojshëm edhe koordinimi me partnerët tanë ndërkombëtar.

Po ashtu, gjatë bisedës Kurti foli për nevojën e reformimit të administratës publike dhe për përmirësimin e sistemit të degraduar shëndetësor. Degradimi i mjedisit është një tjetër brengë e cila ka nevojë për planifikim më të gjerë mes institucionesh dhe politikash publike.

Në lidhje me dialogun me Serbinë, Kryetari i Lëvizjes tha se është i domosdoshëm fuqizimi i shtetit të Kosovës si kusht që një dialog kaq delikat dhe i rëndësishëm të kryhet siç duhet.

Sa i përket zgjedhjeve të 6 tetorit, u tha sesi qytetarët kanë nevojë për një proces zgjedhor të lirë dhe demokratik, me subjektet politike që fokusohen në adresimin e shqetësimeve të qytetarëve. Eshtë e rëndësishme një fushatë zgjedhore pozitive që parashtron zgjidhje për të ardhmen e vendit, një fushatë e qetë dhe e mirëartikuluar që u jep mundësinë të gjithëve të votojnë të sigurtë e të qartë për të ardhmen e vendit.

Në mbyllje të takimit u shpreh gatishmëria për ta vazhduar dhe zgjeruar komunikimin mes nesh.