Krenare Latifi Kqiku: Amaneti i Dëshmorëve është udhërrëfyesi ynë i përhershëm

Sot në Teatrin e Qytetit të Gjilanit u mbajt Akademia për “Epopenë e Zhegocit” , me këtë rast, kryesuesja e Kuvendit të Komunës së Gjilanit, Krenare Latifi Kqiku ka thënë se amaneti i Dëshmorëve është udhërrëfyesi ynë i përhershëm. “Obligimi ynë është që fëmijëve tanë t’u lëmë një Kosovë të fortë, ashtu siç e ëndërruan ata që dhanë gjithçka për këtë vend”, ka thënë ajo, transmeton Portali 2LONLINE.

Ja fjala e saj e plotë:

***

Këtë ditë ia kemi dedikuar tërësisht nderimit të njërës prej ngjarjeve më përcaktuese të historisë sonë të re – 27-vjetorit të Epopesë së Zhegocit dhe Kishnapolës. Sot, në krye të agjendës institucionale, së bashku me familjarë e bashkëpunëtorë, kemi përshkuar rrugën e lavdisë së prillit të vitit 1999, për të rikonfirmuar se liria jonë e ka burimin te sakrifica e pashoq e vajzave dhe djemve më të mirë të këtij vendi.

Kjo ditë na kthen në 15 prillin e vitit 1999, atëherë kur malësia jonë u bë dëshmitare e një prej betejave më heroike të Zonës Operative të Karadakut. Në këtë përvjetor, përulemi para sakrificës së tetë dëshmorëve të UÇK-së që ranë në këtë betejë:

Pajazit Ahmeti – Paja
Alban Ajeti
Hanumshahe Abdullahu
Tefik Zymberi
Ramadan Hyseni
Shaban Hyseni
Njazi Osmani
Sali Nuhiu

Sot kujtojmë me nderim edhe 18 martirët civilë që u flijuan për liri, duke u bërë pjesë e kësaj historie të lavdishme.

Si përfaqësues të institucioneve, e kemi për detyrë që emrat e tyre t’i mbajmë gjallë jo vetëm në akademi të tilla, por, mbi të gjitha, duke punuar me ndershmëri për vendin; sepse liria që gëzojmë sot e ka zanafillën te shtëpitë-shtabe të Zhegocit dhe te gjaku i derdhur në Kishnapolë.

Amaneti i dëshmorëve është udhërrëfyesi ynë i përhershëm. Obligimi ynë është që fëmijëve tanë t’u lëmë një Kosovë të fortë, ashtu siç e ëndërruan ata që dhanë gjithçka për këtë vend.

Lavdi e përjetshme dëshmorëve të Zhegocit dhe Kishnapolës!

Lavdi e përjetshme të gjithë të rënëve për liri. /2LONLINE/