Krasniqi-Qeverisë: Sa është borxhi i komunave veriore?

Jakup Krasniqi thotë se Qeveria Mustafa fali borxhlinjtë, por kjo sipas tij, nuk ishte pjesë e programit të LDK-së në fushatë.

Madje sipas tij, Qeveria është dashtë ta dijë secilin me emër e mbiemër dhe shumat, e të gjithë atyre që do u falen borxhet.

Ai thotë se Qeveria duhet të sqaroj çdo detaj rreth faljes së borxheve, madje edhe sa është borxhi i komunave veriore e sa i komunave tjera serbe.

Sipas Krasniqit, nëse nuk dihen këto, krijohet bindja se shteti po i falë hajnat shtetit.

Ja shkrimi i tij i plotë:

Ditëve të fundit, Qeveria Mustafa deklaroi me pompozitet se i fali të gjithë borxhlitë e shtetit të Kosovës, pra të gjithë ata që deri më 31 dhjetor 2008 nuk i kanë shlyer borxhet?! Derisa qeveria e ka marrë ketë vendim është dashur paraprakisht që ti dinë të gjithë kategoritë e borxhlinjve, madje është dashur ti dinë edhe me emër e mbiemër dhe shumat që ata i kanë. Nëse i dinë emrat duhet ti bënë të njohur për opinionin, pasi opinioni publik i Kosovës duhet të dinë edhe arsyeshmërinë e ati vendimi.

Është mirë që qeveria të sqaroj opinionin, se cilët janë borxhlitë e mos pagimit te rrymës elektrike, pasi besohet se në ketë shërbim publik janë shumica e atyre që kanë borxhe. Pastaj sa është borxhi i komunave veriore e sa i komunave tjera serbe, sa është borxhi i komunave të tjera të Kosovës? Cilat dogana i kanë mbetur borxh Buxhetit të Kosovës? Të cilës pjesë te Republikës? Dhe në fund, cilat biznese e kanë ketë lloj të borxhit? Të gjitha këto borxhe duhet të dihen me emër e mbiemër. Unë si qytetar dua që të dijë arsyeshmërinë e kësaj falje.

Nëse nuk dihen këto, atëherë më të drejt krijohet bindja se shteti po i falë hajnat e shtetit?! Qeveria duhet të sqaroj, mos këto borxhe ishin pjesë e bisedimeve në Bruksel? Ai ishte kjo falje e borxheve, pjesë e marrëveshjeve me Serbinë të lidhura në Bruksel?

Qeveria Mustafa duhet ta njoftoj opinionin dhe të jetë transparent me atë. Përndryshe kështu si është, është mashtrim dhe fshehje e së vërtetës! Unë si qytetar kërkoj që ta di të vërtetën.