Krasniqi: PDK-ja të bindet se nuk ka aleatë

Jakup Krasniqi, ka folur për idenë e LDK-së që marrëveshja e Bllokut të ndryshohet, duke thënë se marrëveshjet politike nuk janë të ngurta dhe si të tilla mund të ndryshohen. Deputeti i Kuvendit të Kosovës nga radhët e Nismës, Jakup Krasniqi, ka theksuar ndryshimi imarrëveshjes politike duhet të bëhet bashkërisht.

“Duhet ta kuptojmë të gjithë se objektivi kryesor është projekti I përbashkët, qeverisja ndryshe. Pasi bashkimi ynë nuk është bërë për hir të individit, por për hir të publikut. Mos bini viktima të interesave primitive e meskine”, ka deklaruar Krasniqi për “Epokën e re”.

Ndërkaq, duke iu referuar qëndrimit të PDK-së, se pa një marrëveshje nuk do të thirret seanca konstituive, Krasniqi ka thënë se thirrja e kësaj seance është domosdoshmëri kushtetuese. Ai ka thënë se PDK-ja duhet të bindet se nuk ka aleatë për të qeverisur.

“PDK duhet të bindet se nuk ka aleatë për të qeverisur. Prandaj, është interesi I vendit që ajo të shkojë në opozitë. Thirrja e Kuvendit është domosdoshmëri kushtetuese. Seancën konstituive e kanë të drejtën kushtetuese ta thirrin edhe deputetët”, është shprehur Krasniqi.