Krasniqi: Nëse PDK-ja nuk hap krahun, koalicion LVAN ta shkarkojë Brovinën!
Të enjten më 2 tetor, pritet të mbahet seanca e radhës konstituive e Kuvendit, për zgjedhjen e kryetarit të Kuvendit. Por në bazë të deklaratave të zyrtarëve të PDK-së, pavarësisht se kjo parti nuk do të arrij ta zgjedh kryetarin e Kuvendit pasi ka vetëm 35 deputetë, edhe kjo seancë do të jetë vetëm përsëritje e seancave të kaluara.
Publicisti dhe anëtari i Këshillit të Ekspertëve të LDK-së, Faik Krasniqi, thekson se, ngjashëm si në seancat e kaluara më 17 korrik dhe 18 shtator, që ishim dëshmitar të një shou dhe uzurpim të Kuvendit nga ana e PDK-së, kur në pamundësi që kjo parti ta zgjedhin kryetarin e tyre të Kuvendit, ata prapë me skenar të përgatitur do e shfrytëzojnë anëtaren e saj zonjën Flora Brovina si kryesuese, që ta devijojnë seancën konstituive të Kuvendit.
“Në rast se zonja Flora Brovina, prapë vepron me skenarin e njëjtë si në seancat e kaluara më 17 korrik dhe 18 shtator dhe këtë herë nuk i respekton pikat 126 dhe 127 të Gjykatës Kushtetuese, që t’ju jap të drejtë deputetëve për ta zgjedhur kryetarin dhe nënkryetarët e Kuvendit, atëherë 83 deputetët duhet ta shkarkojnë zonjën Brovina si kryesuese të Kuvendit, në mënyrë që ta bëjnë funksional Kuvendin e Kosovës”- vlerëson Krasniqi.
Sipas tij, as PDK-ja, as SHIK-u, as Flora Brovina, por as Gjykata Kushtetuese me vendime arbitrare dhe askush tjetër, s’guxojnë të bëhen pengesë për krijimin e institucioneve. Sepse kështu do e shkelin prapë vullnetin e shumicës së deputetëve dhe qytetarëve të Kosovës, e këtë gjë janë duke e bërë tash e 4 muaj, duke moslejuar zgjedhjen e kryetarit të Kuvendit dhe formimin e Qeverisë.
‘Kjo Qeveri në largim deri më tash me keqqeverisjen e tyre e kanë dëmtuar mjaft Kosovën. Por me këto veprime ata po e dëmtojnë akoma më shumë, sikurse shtetin por edhe qytetarët e Kosovës. Koalicioni i PDK-së duhet ta kuptojë njëherë e mirë, që 83 deputetë janë më shumë se 37 deputetë, dhe në çdo vend të botës demokratike Qeveria dhe Kuvendi krijohet nga shumica. Kjo parti duhet ta respektojë vullnetin e shumicës dhe nesër të reflektojnë pozitivisht, që pas dështimit të tyre për zgjedhjen e kryetarit të Kuvendit, t’i hap rrugën koalicionit të shumicës LDK-VV-AAK-NISMA dhe minoritetet, ta zgjedhin kryetarin e Kuvendit dhe ta formojnë Qeverinë. Tjetër zgjidhje nuk kanë’, thotë Krasniqi./2L ONLINE/