Krasniqi: Klosi ka merita të mëdha për UÇK-në

Ish-kryetari i Kuvendit të Kosovës dhe anëtar i Shtabit të Përgjithshëm të UÇK-së, Jakup Krasniqi, ka dalë në mbrojtje të Fatos Klosit – ish-shefit të Shërbimit Informativ Shqiptar,

Për të cilin thotë se “ka merita të mëdha për ndihmën që i ka dhënë Ushtrisë Çlirimtare të Kosovës dhe popullit shqiptar”.

Jakupi, përmes një prononcimi në faqen e tij në Facebook, shpreh keqardhje “pse (Klosit) nga Kosova nuk i shkojnë mirënjohje, por akuza shpifëse”.

Ja postimi i plotë i Krasniqit në Facebook, i titulluar “Mirënjohja si institucion”.

“Para disa ditë, në një emision televiziv pash një pamje shumë interesante. Po vizitohej një Kopshti zoologjik, brenda hekurave ndodhnin shumë kafshë të egra. Në mesin e tyre edhe një Luan. Luanin kohë më parë (ndoshta edhe vite) e kishte shpëtuar e rritur një zonjë, kur ai kishte qenë i vogël. Kur zonja që e kishte shpëtuar Luanin ju afrua grilave, Luani ju hedhë në përqafim! Kafsha e egër me gjestin e saj fisnik po e shprehte mirënjohjen ndaj zonjës që ia kishte shpëtuar jetën. Gjëja e parë që me shkoi në mend ishte: Pse njerëzit në kohën tonë e kanë humbur ndjenjën e mirënjohjes?

Sot, kur po lexoja në medie një akuzë të drejtuar ndaj Fatos Klosit, i cili pa asnjë dyshim ka pasur një rol tepër të rëndësishëm, në vitet më të vështira të popullit shqiptar të Kosovës. Zoti Klosi, nuk ka asnjë dyshim që ka merita të mëdha për ndihmën që i ka dhënë Ushtrisë Çlirimtare të Kosovës dhe popullit shqiptar. Ai me kontributin e tij për Kosovën si dhe me kontributin e tij për të shndërruar Sigurimin e Shtetit në Shërbim Informativ Shqiptar, duhet të jetë shembull edhe për gjeneratat e ardhshme. Ai ishte dhe është profesor i nderuar i shkencave te natyrës. Sigurisht që kishte një punë të rëndësishme për shtetin, por ai, as si shef i SHISH-it dhe as sot nuk ka pasur e nuk ka bodigardë. Vetëm kjo flet shumë për atë njeri fisnik. Ai ka shëtitur dhe shëtit në Shqipëri e Kosovë pa asnjë siguri personale. Siguria e tij, është ndershmëria e tij. Unë kam pasur rastin ta njoh dhe me vije keq, madje tepër keq, pse nga Kosova nuk i shkojnë mirënjohje, por akuza shpifëse. Kjo është ligësi. Është interesant, këta njerëz që e akuzojnë pa asnjë argument Klosin, nuk i dëgjon as edhe një herë që t’i akuzojnë Udbashët për veprat e shumta kriminale?!

Mendësia që politika ta merr rolin e gjyqësisë në vetvete është veprim kriminal.

E shfrytëzoj ketë rast, për të falënderuar popullin e Shqipërisë për ndihmën e shumanshme që ka dhënë për popullin tonë të Kosovës. Në ketë rast në mënyrë të veçantë do t’i falënderoja: Presidentin e Shqipërisë të atyre viteve, zotin Rexhep Mejdanin, Kryetarin e PSSH-së, zotin Fatos Nanon, Shefin e SHISH-it, zotin Fatos Klosin, Gjeneralin, Kudisi Lamen dhe Kryeministrin, zotin Pandeli Majkon dhe të gjithë ata zyrtarë që ndihmuan dhe nuk penguan njerëzit tanë në Shqipëri.
Pa këta njerëz dhe pa Shqipërinë, sigurisht që nuk do të ishim këtu ku jemi.

Unë edhe në ketë rast, Ua shprehi mirënjohjen time të sinqertë dhe u jam mirënjohës për jetë atyre njerëzve!”.

KOMENTE