KPK propozon Zejnullah Gashin për dekretim në pozitën e Kryeprokurorit të Shtetit

Këshilli Prokurorial i Kosovës (KPK) nën udhëheqjen e Kryesuesit Arian Gashi, mbajti sot mbledhjen e radhës, në të cilën u shqyrtua ecuria e procedurës për përzgjedhjen e Kryeprokurorit të Shtetit dhe u zhvillua procesi i votimit për nominimin e kandidatit që do t’i propozohet për emërim Ushtrueses së Detyrës së Presidentes së Republikës së Kosovës, znj. Albulena Haxhiu.

Kryesuesi i Këshillit Prokurorial të Kosovës, Arian Gashi, me këtë rast njoftoi se brenda afatit ligjor të përcaktuar me konkurs janë pranuar pesë aplikacione, përkatësisht nga kandidatët: Atdhe Dema, Naim Abazi, Rafet Halimi, Shqipdon Fazliu dhe Zejnullah Gashi, si dhe bëri të ditur se, pas shqyrtimit të aplikacioneve nga Sekretariati i KPK-së, është konstatuar se të gjithë kandidatët kanë përmbushur kushtet e parapara për aplikim.

“Kandidatët i janë nënshtruar procesit të intervistimit dhe vlerësimit nga paneli vlerësues, ndërsa rezultatet janë përllogaritur dhe publikuar në pajtim me procedurat e konkursit. Kandidatët kanë pranuar edhe kopjet e vlerësimit përfundimtar nga të gjithë anëtarët e panelit vlerësues dhe kanë pasur të drejtën e ushtrimit të ankesës deri më 7 korrik 2026”, theksoi z.Gashi.

Pas shqyrtimit të Raporti final të Panelit Vlerësues, procesi i votimit për nominimin e Kryeprokurorit të Shtetit është zhvilluar me votim të fshehtë. Në këtë votim nuk mori pjesë anëtari i Këshillit, Milot Krasniqi, i cili deklaroi se abstenon nga pjesëmarrja në votim.

Pas përfundimit të votimit, Kryesuesi i KPK-së konstatoi se kandidati Zejnullah Gashi ka marrë pesë vota, ndërsa kandidati Rafet Halimi një votë.

Në përputhje me rezultatin e votimit, Këshilli Prokurorial i Kosovës ka nominuar Zejnullah Gashin për pozitën e Kryeprokurorit të Shtetit dhe emri i tij do t’i propozohet Ushtrueses së Detyrës së Presidentes së Republikës së Kosovës për emërim, në pajtim me dispozitat kushtetuese dhe ligjore në fuqi. /2LONLINE/