KPF rekomandon statutin e QKMF-së, PDK e bojkoton takimin
/2L ONLINE/ – Komiteti për Politikë dhe Financa (KPF), të martën ka shqyrtuar propozim-vendimin për statutin e Qendrës Kryesore të Mjekësisë Familjare dhe e ka rekomanduar atë për Kuvend Komunal, që seancën e radhës e mban më 30 tetor.
Valentina Bunjaku-Rexhepi, kryesuese e Kuvendit Komunal, ka thënë se mbledhja e KPF është ftuar pas konsultimeve që një ditë me parë ishin bërë me shefat e grupeve të këshilltarëve komunalë dhe ku ishte arritur pajtimi për të proceduar statutin e QKMF-së për mbledhjen e radhës së Kuvendit Komunal. Megjithatë, anëtarët e KPF nga radhët e PDK-së e kanë bojkotuar takimin e KPF-së.
Në takimin me shefat e grupeve të këshilltarëve komunalë, një ditë më parë, sqarime rreth statutit të QKMF-së ka dhënë Zejdush Tahiri, këshilltar i ministrit të Shëndetësisë, i cili ka thënë se ky akt normativ është i njëjtë për të gjitha komunat e Kosovës.
Përkundër faktit se ne u pajtuam me të gjithë shefat e grupeve të këshilltarëve për të mbajtur mbledhjen e Komitetit për Politikë dhe Financa, me një pikë të vetme, statuti i QKMF – së, përfaqësuesit e PDK-së e bojkotuan sot takimin, ka thënë Rexhepi-Bunjaku.
Projekt-statuti i QKMF-së ishte kthyer për disa sqarime. /2L ONLINE/