KPF rekomandon raportin financiar janar-qershor 2015
/2L ONLINE/ – Komiteti për Politikë dhe Financa (KPF), të hënën, në takimin e radhës, të cilin e ka kryesuar Valentina Bunjaku-Rexhepi, ka shqyrtuar dhe rekomanduar për Kuvend Komunal raportin financiar për periudhën janar-qershor 2015, rekomandimin e Komitetit për Shëndetësi për emërtimin e QKMF-së, propozim-vendimin për shfuqizimin e vendimit nr 16-24249 si dhe vendimit nr 16-242555 të datës 15.03.2013, propozim-vendimin për emërimin e Komisionit për përcaktimin e lokacioneve dhe hapësirave publike për vendosjen e përmendoreve, propozim-vendimin për emërimin e Këshillit komunal për vlerësimin e meritave historike e shoqërore të personaliteteve dhe ngjarjeve brenda territorit të komunës si dhe tërësia etnike shqiptare. Po ashtu në këtë takim, janë dhënë informata për manifestimin “Flaka e Janarit 2015” si dhe për punën 6-mujore të Këshillit Komunal për Siguri në Bashkësi.
Ilmi Limoni, drejtor financiar, ka thënë se raporti pasqyron në detaje të hyrat dhe shpenzimet e kësaj periudhe, të cilat janë përafërsisht të njëjta me vitin e kaluar. Te tatimi në pronë është reflektuar vendimi i qeverisë për faljen e borxheve, megjithëse në krahasim me 6-mujorin e vjetëm, të hyrat janë më të mira, ka thënë Limoni.
KPF e ka miratuar edhe propozimin e Komitetit për Shëndetësi, për emrin e QKMF-së me emrin e ish-mjekut Nagip Rexhepi, që në seancën e kaluar, siç tha kryesuesja Valentina Bunjaku-Rexhepi, nuk ishte shqyrtuar për shkak të procedurave.
Rezerva ka shprehur Bujar Nevzati (PDK), duke thënë se ky është një propozim politik. Gjilani nuk e ka vetëm një emër që të mos ketë edhe propozime tjera, ka thënë ai.
Edhe Nevzad Isufi (VV) tha se nuk kishte kundër emrit konkret, por sipas tij, paqartësi ka shkaku i mungesës së një rregulloreje për emërtime, sepse emërtimet nuk mund të bazohen te peticionet, siç thuhet në këtë rast se është nënshkruar nga punëtorët shëndetësorë. /2L ONLINE/