Kosova sfidon Xhamajkën më 5 mars!

Përfaqësuesja e Kosovës në futboll pritet ta zhvillojë miqësoren e parë ndërkombëtare me leje të FIFA-s, më 5 mars në Gjenevë kundër Xhamajkës. Burime të besueshme i kanë thënë RTK-së se marrëveshja ndërmjet dy federatave është arritur të hënën, por problem në zyrtarizimin e kësaj ndeshjeje është duke paraqitur Federata zvicerane e futbollit, e cila çuditërisht nuk po e jep lejen që kjo miqësore të zhvillohet në territorin e saj.

“Kompania ndërkombëtare të cilën e ka angazhuar FFK-ja për organizimin e miqësores së 5 marsit i ka kryer të gjitha detajet e marrëveshjes me Federatën e Xhamajkës dhe me zyrtarët e Kantonit të Gjenevës, por problemi është paraqitur tek Federata zvicerane, e cila nuk po e jep pëlqimin që kjo ndeshje të zhvillohet në Gjenevë”, ka thënë burimi i RTK-së.

Pikërisht për këtë arsye kryetari i FFK-së, Fadil Vokrri, gjatë ditës së sotme do të qëndrojë në Gjenevë, ku do të takohet me zyrtarët e kësaj kompanie në mënyrë që të gjejë një zgjidhje për të mos dështuar tashmë miqësorja e aranzhuar me xhamajkanët.

Gjithnjë sipas burimit të RTK-së, kreu i FFK-së dhe kompania e aranzhuar për këtë miqësore do të bëjnë çmos që të bindin zviceranët që kjo ndeshje të zhvillohet në Gjenevë, aty ku Përfaqësuesja e Kosovës do ta kishte përkrahjen e madhe të bashkatdhetarëve, por mund edhe të negociohet për ndonjë vend tjetër, por paraprakisht duhet të merret pëlqimi nga Federata xhamajkane.

Në opsion për miqësoren e parë të Kosovës më herët janë përmendur edhe Kolumbia, Gana, Ishujt Faro, Senegali, El Salvadori e Mauritania. Dëshira e drejtuesve të FFK-së, ashtu si e të gjithë dashamirëve të futbollit, ishte që ndeshjen e parë ta zhvillonin në Kosovë, mirëpo meqenëse shumica e kombëtareve evropiane i kishin caktuar shumë kohë më parë miqësoret e 5 marsit, por edhe për faktin që infrastruktura e stadiumeve tona nuk ishte në gjendjen më të mirë, bëri që KE i FFK-së ta japë pëlqimin që miqësorja e parë nën ombrellën e FIFA-s të luhet jashtë vendit.