Kosova publikon listën për sfidën ndaj Sllovakisë

Përzgjedhësi i Kombëtares së Kosovës në futboll, Franco Foda, ka publikuar listën e futbollistëve të ftuar për ndeshjet e “play-off”-it në kuadër të kualifikimeve për Kupa e Botës 2026.

“Dardanët” do të përballen me Kombëtarjen e Sllovakisë në futboll në ndeshjen gjysmëfinale të “play-off”-it, e cila zhvillohet më 26 mars në Bratisllavë. Kjo sfidë konsiderohet vendimtare për ambiciet e Kosovës drejt një kualifikimi historik.

Në rast se Kosova arrin të sigurojë fitoren, atëherë do të luajë finalen e “play-off”-it më 31 mars në stadiumin “Fadil Vokrri” në Prishtinë. Kundërshtari në këtë ndeshje do të jetë fituesi i përballjes ndërmjet Turqisë e Rumanisë.

Ndërkohë, përzgjedhësi Foda pritet të japë më shumë detaje rreth listës së futbollistëve dhe përgatitjeve për këtë përballje të rëndësishme në konferencën për media, e cila do të mbahet më 23 mars, duke filluar nga ora 12:00, në hotelin Emerald. Po atë ditë do të nisë edhe grumbullimi zyrtar i ekipit kombëtar.

Kosova hyn në këtë fazë me synimin për të bërë histori dhe për të siguruar një vend në Botërorin 2026, duke u mbështetur në formën e lojtarëve dhe përgatitjet e stafit teknik. /2LONLINE/