Kosova pa barna për trajtimin e Ebola-s

Në Kosovë nuk është regjistruar asnjë rast i dyshuar me virusin Ebola, mirëpo Klinika Infektive nuk ka barna për mbrojtje ndaj këtij virusi. Megjithatë, drejtori i Klinikës Infektive, Shemsedin Dreshaj, thotë se nëse paraqiten rastet e para mundë t’i mjekojnë me metodat të cilat i kanë përdorur edhe për viruset e tjera.

“Deri më sot nuk kemi preparate të tjera mjekësore për këtë sëmundje mirëpo ne kemi një sasi të mjaftueshme të pajisjeve mjekësore që i trajtojmë pacientët e prekur nga ethet hemorragjike dhe rastet e para të virusit Ebola mundë t’i trajtojmë me ato, mirëpo në rast se na duhet, besoj se do ta kemi mbështetjen nga QKUK-ja, në mënyrë që të dalim faqebardhe”, ka thënë Deshaj për Televizionin Publik të Kosovës.

Ai thotë se virusi Ebola mund të jetë vdekjeprurës mirëpo ende nuk ka arritur të dalë nga kontinenti i Afrikës.

Simptomat e para janë temperaturë, të vjella, dhimbje të muskujve, gjakderdhje lëkurore dhe brendshme. Ky virus mund të përhapet përmes rrugëve të frymëmarrjes, rrugëve ajrore, kontakt direkt dhe indirekt.