Kosova në Festivalin Olimpik Evropian për të Rinj “Baku 2019”, imazhe krenarie

Kosova është pjesëmarrëse në Festivalin Olimpik Evropian për të Rinj “Baku 2019”. Kosova po përfaqësohet nga 18 sportistë të moshës 15-18 vjeçare, të cilët përfaqësojnë pesë sporte të ndryshme: xhudo, atletikë, not, mundje dhe tenis.

Në ceremoninë hapëse, ekipit kombëtar i priu medalistja e bronztë Olimpike për të rinj, Buenos Aires 2018, xhudistja, Erza Muminoviq.

Në fshatin olimpik ku ekipi i Kosovës po qëndron, kudo nëpër ndërtesa shihet flamuri i Kosovës, si përfaqësuesit më të lartë shtetëror në këtë garë.

Në këtë garë ku po marrin pjesë ekipe përfaqësuese të mbi 30 shtete evropiane, aty është edhe ekipi nga Shqipëria.

E ekipet shqipfolëse nga Kosova dhe Shqipëria kanë realizuar një fotografi të përbashkët, duke e formësuar simbolin kombëtar, shqiponjën. Ky imazh ishte padiskutim fotoja e ditës nga kryeqyteti i Azerbejgjanit, Baku.

Kosova nuk e ka nisur edhe mbarë këtë garë, pasi dy sportistët e parë pjesëmarrës kanë shënuar humbjet e para.

Tenisti, Melos Nallbani pësoi humbje nga rumuni me shumë përvojë, Alin Fatu, 2:0 në sete (6:0, 6:2). Nallbani në setin e dytë deri diku ishte rival i barabartë me kundërshtarin, çka dëshmoi se ka të ardhme të ndritur.

Ndërsa, mundësja Njomëza Krasniqi nuk arriti të kalojë gjermanen favorite dhe me shumë cilësi, Rebekka March, kategoria -49 kilogramë.