Kosova me formimin e ushtrisë, kompleton mekanizmin e sigurisë

Njohësi i çështjeve të sigurisë, Avni Islami, thotë se ndërrimi i Komandantit të FSK-së, nuk do të sjellë ndonjë risi. Sipas tij, edhe Rrahman Rama sikurse paraardhësi i tij, Kadri Kastrati, duhet t’i vazhdoj punët dhe objektivat aty ku kanë mbetur.

“Ndërrimi i Komandantit të FSK-së, nuk do të sjellë ndonjë risi për arsye se objektivat e Ushtrisë së ardhshme të Kosovës nuk janë ditore, por janë objektiva afatgjate. Si çdo paraardhës i tij edhe Komandant Gjeneral Rrahman Rama, duhet t’i vazhdoj punët dhe objektivat aty ku kanë mbetur. Pra, misioni i tij së bashku me miqtë amerikan dhe të tjerët, është që FSK sa më parë të transformohet në Ushtrinë e Kosovës me të gjitha kapacitetet operacionale të saj”, ka thënë Islami në një bisedë për Indeksonline.

Islami, konsdireon se Kosova me formimin e Ushtrisë e kompleton mekanizmin e saj të sigurisë toksore e ajrore.

“Nuk ka shtet pa ushtri. Pra, Kosova me formimin e ushtrisë e kompleton mekanizmin e saj të sigurisë toksore e ajrore. Megjithatë, komandanti i FSK-së do të përballet me shumë sfida deri në finalizimin e Ushtrisë së Kosovës, edhe pse roli i FSK-së ishte duke u kufizuar dhe mbetet i tillë, ajo me ato kompetenca që i ka, ka treguar profesionalizëm, disiplinë dhe punë në shumë aktivitetet që ishte pjesëmarrje e sidomos në operacionet e kërkim shpëtimit”, theksoi ai.