Kosova e bronztë në Evropian, kryetari i Gjilanit uron karateistet e veçmas ato nga Gjilani
Ekipi i vajzave në karate ka fituar medaljen e bronztë në Kampionatin Evropian, që po mbahet në Yerevan të Armenisë.
“Vajzat tona të përbëra nga Fortesa Orana, Vlera Qerimi, Behije Mustafa e Elmedina Istogu, të udhëhequra nga përzgjedhësi Isak Curri, triumfuan ndaj Greqisë në luftën për medalje. Më herët kishin mundur Armeninë, Spanjën dhe Ukrainën”, thuhet në njoftimin e Komitetit Olimpik të Kosovës.
“Urime vajzave, trajnerëve dhe FKK-së. Është kjo medalja e dytë e bronztë për ekipin tonë, pas asaj të fituar dje nga Betim Maliqi”, thuhet tutje në këtë urim.
E vajzat karateiste të bronzta në Evropian, në mesin e të cilave janë edhe karateistet nga Gjilani janë uruar edhe nga i pari i Gjilanit, Alban Hyseni i cili ka thënë se garueset nga Gjilani përsëri në podium!
Ai tha se vajzat e Kombëtares së Kosovës na emocionuan sot me paraqitjen e tyre të jashtëzakonshme në Kampionatin Evropian, duke siguruar vendin e tretë dhe medaljen e bronztë.
“Veçanërisht jemi krenarë për Fortesa Oranën dhe Vlera Qerimin, dy garueset nga qyteti ynë, që me talentin dhe përkushtimin e tyre e ngritën edhe më lart emrin e Gjilanit. Urime kampione – falë jush, flamuri ynë valoi me krenari në Evropë”, ka thënë kreu i Gjilanit, Alban Hyseni. /2LONLINE/