Kosova dhe Shqipëria shënojnë ngritje në ranglistën botërore të FIFA-s

FIFA ka publikuar renditjen e re në ranglistën botërore të kombëtareve, ku vërehet një ngritje e lehtë nga Përfaqësuesja e Kosovës. Përfaqësuesja e Kosovës ka shënuar ngritje në ranglistën e re të FIFA-s, pasi është ngjitur për një pozitë nga muaji i kaluar.

Kosova tani gjendet në vendin e 130 me 1149 pikë, ndërsa ngjitje për dy pozita ka pasur edhe Shqipëria. Kombëtarja e Shqipërisë ishte në pozitën e 66-të, ndërsa tani renditet e 64-ta me 1362 pikë.

Në ranglistën e re botërore të FIFA-s është parë një ndryshim i vogël në top 10 kombëtaret më të mira në botë.

Primati vazhdon të mbahet nga kombëtarja e Belgjikës, e cila tani pasohet nga Brazili e pastaj nga Franca, Anglia dhe Uruguai.

Në pozitën e gjashtë gjendet Portugalia, ndërsa pas tyre vjen Kroacia, Kolumbia, Spanja dhe Argjentina.