Kontrollet e rregullta shpëtojnë jetë, QKMF-ja në Gjilan me aktivitet sensibilizues

Me mbështetjen e menaxhmentit të Qendrës Kryesore të Mjekësisë Familjare QKMF “Dr. Nagip Rexhepi” në Gjilan, është organizuar aktivitet sensibilizues me rastin e Ditës Botërore të Hipertensionit, në bashkëpunim me Drejtoria e Shëndetësisë dhe Instituti Rajonal i Shëndetit Publik.

Drejtuesit e QKMF-së kanë bërë të ditur se qëllimi i këtij aktiviteti ishte promovimi i shëndetit dhe ngritja e vetëdijes tek qytetarët për parandalimin dhe menaxhimin e tensionit të lartë të gjakut, si një ndër problemet më të shpeshta shëndetësore.

Gjatë aktivitetit, stafi shëndetësor ka realizuar matjen e tensionit arterial, ka ofruar këshilla shëndetësore për qytetarët, si dhe ka shpërndarë informacione lidhur me rëndësinë e kontrolleve të rregullta dhe faktorët e rrezikut që ndikojnë në hipertension.

Nga menaxhmenti i QKMF-së është vlerësuar rëndësia e aktiviteteve të tilla sensibilizuese, të cilat kontribuojnë në edukimin shëndetësor të qytetarëve dhe në parandalimin e komplikimeve që mund të shkaktohen nga tensioni i lartë i gjakut.  /2LONLINE/