Konferencë mbi perspektivën e Ndërtimit të Integritetit në Ministrinë e FSK-së

Në Ministrinë për Forcën e Sigurisë së Kosovës sot u mbajt Konferenca; Perspektiva e Ndërtimit të Integritetit në Ministrinë e Forcës së Sigurisë së Kosovës, ku morën pjesë ministri i MFSK-së z.Haki Demolli, zëvendës ministrat: Fadil Gashi dhe MuhametLatifi, sekretari i përgjithshëm i MFSK-së, z. Shkëlzen Sylaj, ambasadorë, atashetë, këshilltarë të NATO-s, dhe NLAT-it në MFSK, përfaqësues të Qendrës për Integritet në Sektorin e Mbrojtjes të Ministrisë së Norvegjisë, drejtorët e Drejtorive dhe Departamenteve të MFSK-së si dhe përfaqësues të shoqërisë civile.

Konferenca është mbajtur në përkrahje të plotë të Ministrisë së Mbrojtjes të Norvegjisë dhe Qendrës Kosovare të Studimeve të Sigurisë ( QKSS)

Konferencën e hapi ministri i MFSK-së, z. Haki Demolli, i cili pasi përshëndeti pjesëmarrësit, Ai ka falënderua posaçërisht Qeverinë e Norvegjisë e cila po ndihmon Ministrinë e FSK-së, me projekte për ngritjen dhe fuqizimin e integritetit në MFSK. “Jemi të kënaqur që Mbretëria e Norvegjisë si një shtet mik i Republikës së Kosovës po vazhdon të afrojë asistencën dhe mbështetjen e saj në proceset shtet formues në Kosovë, përfshirë edhe sektorin e sigurisë“.

Duke folur për ngritjen dhe sforcimin e integritetit të punësuarve në ministrinë e FSK-së, Ministri Demolli shtoi se:” një ndër qëllimet dhe prioritet themelor, të cilat synojnë t’i realizojë gjatë mandatit tim, si ministër i MFSK-së është ngritja dhe sforcimi i integritetit të të punësuarve në MFSK. Integriteti është një normë e cila nuk duhet nënkuptuar vetëm nga aspekti i ngushtë, pra ai praktik i etikës, por para së gjithash duhet nënkuptuar edhe nga aspekti i ndërtimit dhe zhvillimit të mekanizmave që mundësojnë parandalimin e korrupsionit dhe keqpërdorimeve të tjera në detyrë. Në këtë rrafsh, MFSK-ja do të përfshihet në planin veprues të Strategjisë Kundër Korrupsionit. Si rrjedhojë, pritet që MFSK do të ketë obligime shtesë për zbatimin dhe përkushtimin e të gjitha kërkesave në funksion të ngritje së integritetit. Ngritjen e integritetit në MFSK-së, nuk duhet parë vetëm si një detyrë që duhet përmbushur, por edhe si një normë dhe vlerë që duhet integruar dhe forcuar në të gjitha nivelet e MFSK/FSK”.

Ministri Demolli, më tej, u ndal edhe tek praktikat e shteteve demokratike, për të shtuar se: “duke pasur parasysh praktikat e shteteve më demokratike në të cilat sektori i mbrojtjes reflekton nivelet më të larta të integritetit krahasuar me sektorë tjerë, ne synojmë që Ministria jonë të jetë model dhe kampion i integritetit në raport me agjencitë dhe ministritë tjera”. Në fund, Ai, tha se do të angazhohemi maksimalisht që të zbatohet parimi i meritës në rekrutimin dhe gradimin e personelit, sepse ky proces paraqet një ndër shtyllat themelore të integritetit në MFSK. Përkushtimi ynë është për aplikimin e të gjitha parimeve që burojnë nga programi i NATO-s.

Ndërsa, ambasadori i Norvegjisë në Kosovë, Jan Braathu, tha se këtë projekt e ka realizuar shteti i tij, në shumë shtete që tanimë janë anëtare të NATO-s. Nuk është projekt eksperiment por i implementuar paraprakisht dhe si i tillë realizohet me shumë përkushtim, me ndihëm dhe praktikat e sjella nga Norvegjia. Ky projekt do t`i ndihmoj Forcës së Sigurisë së Kosovës që të përmbushë një nga kriteret e NATO-s”.

Në Konferencë folën, edhe: Z. Domenic Braithwaite, drejtor i Ekipit Këshillues të NATO-s, në MFSK, i cili u paraqit me temën; perspektivën e NATO, për fuqizimin e integritetit në MFSK-së. Ndërsa, Zoti Sven Eriksen, këshilltarë i lartë në Qendrën për Integritet në Sektorin e Mbrojtjes në Ministrinë e Mbrojtjes, Norvegji, elaboroi temën: Vlerësimi i integritetit në sektorin e mbrojtjes në Evropën Juglindore, kurse, z. Florian Qehaja, udhëheqës i Ekipit të Projektit për Kosovë, paraqiti temën: Gjendja ekzistuese e integritetit në MFSK, etj. Konferenca i përmbylli punimet me diskutime konkrete, rreth perspektivës së ndërtimit të integritetit në Ministrinë e FSK-së. Në fund, Konferenca nga organizatori dhe pjesëmarrësit u vlerësuan shumë e suksesshme.