Komunikimi joformal ne institucione/organizata publike!
Shkruan: Arben Dubova
Dekada e fundit e cila karakterizohet me avancim të aplikacioneve për komunikim interpersonal në komunikim masiv siç janë grupet e krijuara brenda këtyre platformave, fatkeqësisht i ka ekspozuar edhe institucionet publike dhe organizatat tjera me interes publik!
Komunikimi i pjesëtarëve të këtyre organizmave nëpër grupe të krijuara në këto platforma, nga ai joformal gjithnjë e më tepër po rrëshqet në komunikim formal (zyrtarë), gjë e cila as nuk është profesionale e as etike, sepse komunikimet e tilla edhe janë për çdo kritikë në aspektin gjuhësorë dhe shpesh dalin nga kontesti, madje ato edhe eskalojnë deri në fyerje, kërcënime e banalitete të ndryshme gjë e cila e diskrediton vetë organizatën!
Jemi dëshmitarë se sot shumë më tepër shfrytëzohen platformat si Viber, Whatsap e tjera për komunikim zyrtarë se sa procesverbalet e mbledhjeve dhe e-mailat.
Kjo dukuri e rrit mundësinë e ekspozimit të këtyre komunikimeve në publik e që në fakt jo çdo komunikim zyrtarë është për publikun.
Organizmat publik pas çdo takimi formulojnë komunikata zyrtare të cilat publikohen e assesi nuk publikohen fjalimet e secilit pjesëmarrës në takime zyrtare, përderisa aktualisht po publikohet pothuaje çdo bisedë (fjalim) i secilit anëtarë edhe nëse ai fjalim është përtej çdo etike!
Rasti më i freskët është ky i LDK-së, komunikimet e anëtarëve të së cilës po dalin në publik pa leje paraprake për publikim të tyre dhe fajtorë për këtë gjë është vet kryetari i partisë i cili ka lejuar madje është bërë pjesë e këtij komunikimi për çështje tejet serioze që do të duhej të trajtoheshin në vijë zyrtare (mbledhje të partisë) e asesi nëpër platforma e grupe komunikimi!
Prandaj, organizmat publik e sidomos institucionet publike duhet urgjentisht që ta ndërprejnë praktikën e krijimit të grupeve nëpër platforma të ndryshme dhe ta ruajnë komunikimin tradicional (mbledhjet zyrtare dhe e-mailat), në të kundërtën komunikimet e tilla çdo herë i ekspozohen publikimit të paautorizuar si dhe ndërhyrjes në ato komunikime e cila fillimisht e dëmton vet organizatën dhe e huton publikun!
Kujdes nga teknologjia! /2LONLINE/