Komuna me donatorët vënë gurëthemelin e shtëpisë së Naser Hazirit në Zhegër të Gjilanit

/2L ONLINE/ – Është vënë sot gurëthemeli i shtëpisë së Naser Hazirit në Zhegër të Gjilanit, që është e 27-ta që po ndërtohet pas mbrëmjes humanitare “Pak nga ne, shumë për ata”, të organizuar me iniciativë të kryetarit Haziri.Në vënien e gurëthemelit ka marrë pjesë kryetari Lutfi Haziri me bashkëpunëtorë dhe donatori Hysen Hyseni, pronar i “Ceni Company”.

“E falënderoj donatorin, Hyseni Hyseni, i cili pa hezitim i është përgjigjur thirrjes sime për t’u dalë në ndihmë familjeve në nevojë. Sot është vënë gurthemeli i shtëpisë së 27-të, në kuadër të programit për zgjidhjen e problemit të banimit social. Besoj shumë që në afat rekord do të përfundohet nga donatori “Ceni Company” dhe familja e Naser Hazirit do të bëjë jetë dinjitoze. Ky është qëllimi ynë që të gjitha familjeve t’ua zgjidhim problemin e banimit”, ka thënë pas vënies së gurëthemelit, kryetari i Gjilanit, Lutfi Haziri.

Nga ana e tij, donatori Hysen Hyseni ka përgëzuar kryetarin Haziri për iniciativën kaq të suksesshme për t’u dalë në ndihmë familjeve në nevojë, duke shtuar sapo e ka dëgjuar apelin, i përgjigjur mënjëherë sepse, sic tha, “nuk ka ndjenjë më të mirë se t’i sigurosh një familjeje kulm mbi kohë nga të ardhurat e biznesit”.

Kryetari Haziri ka bërë të ditur se brenda 10 ditësh do të filloj ndërtimi edhe i 3 shtëpive të reja për familjet në nevojë, derisa është shprehur se Komuna është duke bërë pagesën e qirasë për 40 familje, ndërkaq do të vazhdohet edhe me renovimin e 35 shtëpive, sipas kërkesave të qytetarëve. /2L ONLINE/