Komuna e Vitisë shprehu falënderime për shtetet që kontribuuan në çlirimin e Kosovës

Me rastin e 22 vjetorit të sulmeve të NATO-së mbi caqet e ushtrisë serbe në Kosovë, Institucionet komunale kanë organizuar një pritje për Njësitin ndërlidhës të KFOR-it amerikan që janë në mision në Kosovë.

Kryetari i komunës Sokol Haliti, me këtë rast ka falënderuar ata për kontributin që Aleanca Veriatlantike ka dhënë për çlirimin e Kosovës, si edhe për misionin paqeruajtës në këto dy dekada.

 “Në ditën e sotme 22 vjet më parë, NATO-ja filloi fushatën e bombardimeve kundër forcave serbe, duke shënuar kësisoj fillimin e fundit të luftës gati dyvjeçare në Kosovë. Kjo fushatë pasoi refuzimin e Beogradit për të nënshkruar marrëveshjen e negociuar në Rambouiet të Francës, për t’i dhënë fund luftës në Kosovë dhe dështimin e përpjekjeve diplomatike për ta bindur atë. Prandaj, populli i Kosovës, do të jetë mirënjohës përgjithmon shteteve aleate të NATOS-së, e posaqërisht Shteteve të Bashkuara të Amerikës, për këtë kontribut të pamohueshëm, në çlirimin e vendit”, ka thënë kryetari Haliti.

Me rastin e 22 vjetorit të fillimit të bombardimeve të NATO-së mbi ushtrinë agresore serbe të vitit 1999, udhëheqësit komunal të shoqëruar edhe nga ushtarët amerikan të KFOR-it, kanë vendosur lule tek busti i ambasadorit amerikan Richard Hoolbrok, në Viti, ku u priten me lule edhe nga fëmijët e Qerdhes “Gëzimi Ynë”. /2LONLINE.com/