Komuna e Vitisë shënon Ditën Botërore kundër Duhanit

Sot në kuadër të Ditës Botërore kundër Duhanit në Komunën e Vitisë janë zhvilluar disa aktivitete për ndërgjegjësimin, ngritjen e njohurive dhe motivimin e të rinjve kundër konsumimit të duhanit, të gjitha në koordinim në mes të QKMF-së, DKA dhe QRSHP në Gjilan, pjesëmarrës ishte edhe drejtori i DSHMS-së ne Viti Halil Musliu.

Fillimisht, ekipa mjekësore ka shpërndarë fletëpalosje për qytetarët e rastit për efektet negative të pirjes së duhanit në shëndet, si dhe ndërgjegjësimi se si ta luftojmë këtë dukuri.

Dr.Festona Qamili ka mbajtur ligjëratë para punëtorëve shëndetësorë mbi rrezikun e konsumimit të duhanit dhe pasojat e tij.

Pastaj, nëpër shumicën e shkollave nga arsimtarët është mbajtur ligjërata për efektet negative të duhanit, ku një orë mësimore iu është kushtuar kësaj dite.

Nxënësit u njoftuan që brenda një viti, nga pirja e duhanit vdesin 8 milionë njerëz. Ndikimi negativ i duhanit dhe tymit të duhanit ka si rezultat shumë sëmundje të rënda si: kanceri i mushkërive, kanceri i fytit dhe zgavrës se gojës, sëmundjet e zemrës, enëve të gjakut dhe trurit, bronkiti kronik, sëmundjet kronike joinfektive dhe shumë sëmundje të tjera.

Kurse, nxënësit e shkollës fillore “Dëshmorët e Lubishtës” janë shpallur fitues të projektit në luftën kundër duhanit nga Instituti Kombëtar i Shëndetit Publik.

Përndryshe , Dita Botërore pa duhan shënohet prej vitit 1978, me 31 maj të çdo viti. /2LONLINE/