Komuna e Vitisë diskuton mundësitë për investime në sistemet e ngrohjes me biomasë përmes PPP-së

Kryetari i Komunës së Vitisë, Sokol Haliti, ka zhvilluar një takim pune me përfaqësues të organizatës CNVP, në kuadër të projektit SUNREED, ku është diskutuar procesi i investimeve të mundshme në sistemet e ngrohjes me biomasë përmes modelit të Partneritetit Publiko-Privat (PPP).

Gjatë takimit u prezantuan mundësitë dhe hapat e nevojshëm për shndërrimin e idesë për ngrohje qendrore me biomasë në një projekt të zbatueshëm, duke u fokusuar në përgatitjen e udhëzuesve, dokumenteve orientuese dhe koordinimin e veprimeve të mëtejme.

Bëhet me dije se eksperti i angazhuar për PPP në kuadër të projektit SUNREED është duke përgatitur një udhëzues të veçantë për komunat, i cili synon të ndihmojë në planifikimin dhe realizimin e investimeve në sistemet e ngrohjes me biomasë sipas standardeve të partneritetit publiko-privat.

Në këtë takim u diskutuan gjithashtu çështje që lidhen me modelet e mundshme të PPP-së, përgjegjësitë institucionale, menaxhimin e rreziqeve dhe përgatitjen e dokumentacionit të nevojshëm për fazat e ardhshme të projektit.

Kryetari Haliti tha se komuna e Vitisë mbetet e përkushtuar për zhvillimin e projekteve të qëndrueshme energjetike, që ndikojnë në mbrojtjen e mjedisit, përdorimin e burimeve të ripërtëritshme dhe përmirësimin e shërbimeve për qytetarët. /2LONLINE/