Komuna e Gjilanit zotohet se do t’i përmbush kërkesat e qytetarëve për investime

/2L ONLINE/ – Po vazhdojnë të mbahen dëgjimet publike me qytetarët për buxhetin e vitit 2016, të organizuara nga Komuna e Gjilanit, përkatësisht Drejtoria për Buxhet dhe Financa.

Me një pjesëmarrje të kënaqshme të qytetarëve, mbrëmë janë mbajtur dëgjimet publike në fshatin Livoç i Epërm dhe Përlepnicë, ku ka marrë pjesë drejtori për Buxhet dhe Financa, Zijadin Maliqi, dhe shefi i Grupit të Këshilltarëve të LDK-së në Kuvend, Avdyl Aliu.

Në këto dy takime, përfaqësuesit e Komunës kanë paraqitur para qytetarëve planin për Buxhetin e vitit 2016, ndërkohë kanë marrë shumë kërkesa për investime kapitale në këto fshatra.

Drejtori për Buxhet dhe Financa, Zijadin Maliqi dhe shefi i GK të LDK-së në Kuvend, Avdyl Aliu, kanë shprehur zotimin e Komunës se me të gjitha kapacitetet e Komunës do t’i përmbushin kërkesat e qytetarëve që dolën nga dëgjimet publike në Livoç të Epërm dhe Përlepnicë.

Ndryshe, të hënën mbahet dëgjimi i fundit publik për Buxhetin 2016, në sallën e mbledhjeve të Kuvendit Komunal, në ora 13:00. /2L ONLINE/