Komuna e Gjilanit vazhdon praktikën e raportimit të hapur për publikun
/2L ONLINE/ – Bordi i Drejtorëve, i udhëhequr nga kryetari i Komunës së Gjilanit, Lutfi Haziri, ka mbajtur sot mbledhjen e dytë raportuese, e cila ka qenë e hapur për publikun me transmetim të drejtpërdrejt në radiot lokale, ku është bërë raportimi për punët e kryera në drejtorinë e Administratës dhe zyrave vartëse kryetarit.
Ndër punët e mëdha që janë realizuar sivjet, kryetari Haziri ka përmendur ndërtimin e 24 shtëpive për familjet në nevojë nga fondi social, pagesën e qirave për 37 familje dhe meremetimin e 35 shtëpive sipas kërkesave të qytetarëve, ndërkaq në proces të ndërtimit të shtëpive në këtë fazë janë edhe 6 shtëpi.
Ai tha se sivjet Komuna e Gjilanit ka marrë çmimin “The Best City Model Award” në panairin ndërkombëtar në Zurich të Zvicës, ku është vlerësuar si shembulli më i mirë për investime të huaja në rajon.
Poashtu, kreu i gjilanasve ka përmendur edhe sukseset e mëdha që janë arritur në sektorin e arsimit, ku nxënësit e Gjilanit kanë dalë kampion në shumë gara, sikurse investimet milionëshe në ndërtim të hapësirave shkollore, pastaj investimet në shëndetësinë primare etj.
Ndërkohë, i pari i Gjilanit tha se investimet e Komunës së Gjilanit në sektorin e bujqësisë së bashku me donatorët kapin shifrën mbi 2.5 milionë euro, duke i dalë në ndihmë bujqve për ta siguruar bukën e gojës nga toka e Gjilanit.
Kryetari i Komunës, Lutfi Haziri, ka vënë në theks edhe punën e madhe që është bërë në infrastrukturë, përkatësisht në ndërtimin dhe hapjen e rrugëve të reja, rrjetin e kanalizimit, të ujësjellësit, ndriçimit dhe krijimin e hapësirave të reja të gjelbëtra.
Një punë tejet e rëndësishme gjatë vitit 2015, sipas Hazirit është bërë me aktin e nënshkrimit të e anëtarësimit të Komunës së Gjilanit në Konventën e Kryetarëve të Komisionit Europian në Bruksel- një lëvizje europiane që përfshinë autoritetet lokale dhe rajonale.
Ndërkaq, për vitin e ardhshëm, Haziri ka ripërsëritur se do të ketë investime në të gjitha fushat në vlerë prej mbi 22 milionë euro, përfshirë edhe hyrje-daljet e qytetit si dhe përgatitjet me kohë për autostradën Prishtinë-Gjilan-Dheu i Bardhë, duke i falënderuar të gjitha qeveritë dhe donatorët e huaj për gatishmërinë për ta ndihmuar ndërtimin e Gjilanit.
Nënkryetari i Komunës, Rexhep Kadriu, ka thënë se viti 2016 është vit i investimeve të mëdha në infrastrukturën publike dhe në Gjilan sipas tij, do të ketë ndërtime të hovshme, duke shtuar se pamja përditë e më shumë po e ndryshon qytetin dhe fshatra që infrastruktura publike.
Nga ana e tij, drejtori i Administratës së Përgjithshme, Nazim Gagica, tha se gjatë këtij viti resori i tij ka realizuar disa projekte në digjitalizim të administratës dhe ofrimin e shërbimeve më afër qytetarit, përfshirë projektin “Apliko Online”, “Puna në Distancë”, Zyre të Hapura”, unifikimin e mbishkrimeve për institucionet dhe shkollat, “E-Kiosqet” etj.
Kurse, Njësia për Kulturë, ajo për Sport dhe Rini, kanë potencuar angazhimet që janë duke i bërë në planifikim, në menaxhim dhe ngritje të kulturës, por edhe angazhim konkret në mbështetje të sportit dhe rinisë në përgjithësi.
Nga ana tjetër me raportet e tyre janë prezantuar edhe Zyra për Informim, punën e së cilës kryetari Haziri e ka vlerësuar lartë për promovimin e transparencës ndaj publikut, pastaj Njësia e Përsonelit, Shërbimi i Kuvendit, Zyra Ligjore, ajo për Kthim dhe Komunitete, Zyra e Integrimeve Europiane, të cilët kanë prezantuar punën e madhe dhe angazhimin që bëhet në këto zyra e që janë angazhime konkrete me volum të madh të punës dhe konform ligjeve të Republikës së Kosovës.
Kryetari Haziri, në mbyllje të takimit, ka falënderuar të gjithë drejtorët, menaxherët e njësive dhe të zyrave, por edhe gjithë shërbyesit civil, për angazhimin dhe punën që e kanë bërë për këtë vit, që sipas tij ishin promotorët e ndryshimeve pozitive në shërbim të qytetarëve. /2L ONLINE/