Komuna e Gjilanit subvencionon 20 persona me aftësi të kufizuara që do të angazhohen në biznese lokale

Kryetari i Komunës së Gjilanit, Alban Hyseni ka bërë me dije se 20 persona me aftësi të kufizuara do të angazhohen në bizneset lokale në periudhë kohore prej 1 viti dhe subvencionim mujor në shumë prej 300€ nga komuna e Gjilanit, si dhe pagesë të kontributeve dhe pensioneve dhe mundësi të rritjes së pagës nga kompania që angazhohet.

“Tejet i lumtur që bizneset lokale iu përgjigjën thirrjes tonë për punësimin e personave me aftësi të kufizuara. Për t’i njoftuar nga afër, realizuam vizita në disa nga bizneset prodhuese/përpunuese në komunën tonë të cilat kanë shprehur gatishmëri për punësimin e personave me aftësi të kufizuara, si “Bujana Produkt”, “Palma”, “RC Cola” dhe “Albimi”,  ka thënë kryetari Hyseni.

Ai u shpreh falënderues ndaj bizneseve të cilat e mirëpritën thirrjen e komunës,  që përpos punësimit e përvojës, iu hap dyert për mundësi të reja, integrim e pavarësi financiare.

“U bëjmë thirrje të na bashkohen edhe bizneset tjera lokale, për përfshirje sa më të madhe në punësim të këtij komuniteti”, ka thënë kryetari Hyseni.  /2LONLINE/